ଭୁବନେଶ୍ୱର: କିଛି ବର୍ଷ ଆଗରୁ କିଏ ବା ଭାବିଥିଲା ଯେ ଆମେରିକାର ପ୍ରିମିୟମ ସ୍ମାର୍ଟଫୋନ୍ ‘ଆଇଫୋନ୍’ ଭାରତ ମାଟିରେ ଏତେ ବିପୁଳ ମାତ୍ରାରେ ତିଆରି ହେବ? ଚୀନ୍ର ଏକଚାଟିଆ ଅଧିକାରକୁ ଜୋରଦାର ଚ୍ୟାଲେଞ୍ଜ ଦେଇ ଭାରତ ଏବେ ଇଲେକ୍ଟ୍ରୋନିକ୍ସ ମାନୁଫ୍ୟାକ୍ଚରିଂର ନୂଆ ପାୱାର ହବ୍ ପାଲଟିବାକୁ ଯାଉଛି। ‘ମେକ୍ ଇନ୍ ଇଣ୍ଡିଆ’ ଅଭିଯାନରେ ଏକ ଅବିଶ୍ୱସନୀୟ ତଥା ଐତିହାସିକ ସଫଳତା ଯୋଡି ହୋଇଛି। ପ୍ରଥମ ଥର ପାଇଁ ଭାରତରେ ଗୋଟିଏ ମାସ ଭିତରେ 1 କୋଟି (10 ମିଲିୟନ୍) ରୁ ଅଧିକ ଆଇଫୋନ୍ ଶିପମେଣ୍ଟ ହୋଇଛି। 2025 ଡିସେମ୍ବର ମାସରେ ଏହି ବିରଳ ରେକର୍ଡ ସୃଷ୍ଟି ହୋଇଛି, ଯାହା ସାରା ବିଶ୍ୱ ବଜାରକୁ ଚମକାଇ ଦେଇଛି।
ଏହି ଅଦ୍ଭୁତପୂର୍ବ ସଫଳତା ପଛରେ କେନ୍ଦ୍ର ସରକାରଙ୍କ ଦୂରଦୃଷ୍ଟିସମ୍ପନ୍ନ ‘ପ୍ରଡକ୍ସନ୍-ଲିଙ୍କଡ୍ ଇନସେଣ୍ଟିଭ୍’ (PLI) ସ୍କିମ୍ର ସବୁଠାରୁ ବଡ଼ ହାତ ରହିଛି। ଏହି ଯୋଜନା ଯୋଗୁଁ ଆପଲ୍ ଭଳି ବିଶ୍ୱସ୍ତରୀୟ ଟେକ୍ ଜଏଣ୍ଟ ଭାରତରେ ନିଜର ଉତ୍ପାଦନ କ୍ଷମତା ବଢାଇବାକୁ ଆଗ୍ରହ ଦେଖାଇଛନ୍ତି। ତାଜା ରିପୋର୍ଟ ଅନୁସାରେ, ଡିସେମ୍ବର 2025 ରେ ଭାରତୀୟ ଫ୍ୟାକ୍ଟ୍ରିରୁ ବାହାରିଥିବା ଆଇଫୋନ୍ ସଂଖ୍ୟା ଅତୀତର ସବୁ ରେକର୍ଡକୁ ପଛରେ ପକାଇ ଦେଇଛି। ଏହା କେବଳ ଏକ ସଂଖ୍ୟା ନୁହେଁ, ବରଂ ଭାରତର ବଢୁଥିବା ଉତ୍ପାଦନ କ୍ଷମତାର ଏକ ଜ୍ୱଳନ୍ତ ଉଦାହରଣ।
ଗୁରୁତ୍ୱପୂର୍ଣ୍ଣ କଥା ହେଲା, ଆଗରୁ ଆପଲ୍ ତାର ଅଧିକାଂଶ ଫୋନ୍ ଉତ୍ପାଦନ ପାଇଁ ଚୀନ୍ ଉପରେ ଅତ୍ୟଧିକ ନିର୍ଭର କରୁଥିଲା। କିନ୍ତୁ ଭୂ-ରାଜନୈତିକ କାରଣ ଏବଂ ସପ୍ଲାଏ ଚେନ୍କୁ ସୁରକ୍ଷିତ କରିବା ପାଇଁ କମ୍ପାନୀ ଏବେ ତାର ରଣନୀତି ବଦଳାଇ ଭାରତ ଉପରେ ଫୋକସ୍ କରୁଛି। ଆହୁରି ଗର୍ବର ବିଷୟ ହେଲା, ଭାରତରେ ତିଆରି ହେଉଥିବା ଏହି କୋଟି କୋଟି ଆଇଫୋନ୍ କେବଳ ଭାରତୀୟ ବଜାରରେ ବିକ୍ରି ହେଉନାହିଁ। ଏଥିମଧ୍ୟରୁ ସିଂହଭାଗ ଫୋନ୍ ଆମେରିକା ଏବଂ ୟୁରୋପ ଭଳି ବିକଶିତ ଦେଶକୁ ରପ୍ତାନି (Export) କରାଯାଉଛି। ଅର୍ଥାତ୍ ବିଦେଶର ଲୋକମାନେ ଏବେ ‘ମେଡ୍ ଇନ୍ ଇଣ୍ଡିଆ’ ଲେଖାଥିବା ଆଇଫୋନ୍ ବ୍ୟବହାର କରୁଛନ୍ତି।
ଅର୍ଥନୈତିକ ବିଶେଷଜ୍ଞଙ୍କ ଆକଳନ ଅନୁଯାୟୀ, ଚଳିତ ଆର୍ଥିକ ବର୍ଷ 2025-26 ଶେଷ ସୁଦ୍ଧା ଭାରତରୁ ଆଇଫୋନ୍ ରପ୍ତାନି 15 ବିଲିୟନ୍ ଡଲାର ବା ପ୍ରାୟ 1500 କୋଟି ଡଲାର ଛୁଇଁବାର ଲକ୍ଷ୍ୟ ରଖାଯାଇଛି। ଫକ୍ସକନ୍, ପେଗାଟ୍ରନ୍ ଏବଂ ଭାରତର ନିଜସ୍ୱ ଟାଟା ଗ୍ରୁପ୍ ଭଳି କମ୍ପାନୀମାନେ ଭାରତରେ ଆପଲ୍ ପାଇଁ ଦିନରାତି ଏକ କରି ଉତ୍ପାଦନ ଚଳାଇଛନ୍ତି।
କେବଳ ଆଇଫୋନ୍ ନୁହେଁ, ସାମଗ୍ରିକ ଭାବେ ଭାରତୀୟ ସ୍ମାର୍ଟଫୋନ୍ ବଜାର ମଧ୍ୟ ଡିସେମ୍ବର ମାସରେ ନୂଆ ଉଚ୍ଚତା ଛୁଇଁଛି। ରିପୋର୍ଟ ମୁତାବକ, 2025 ଡିସେମ୍ବରରେ ଭାରତରେ ମୋଟ ସ୍ମାର୍ଟଫୋନ୍ ଶିପମେଣ୍ଟ 4.6 କୋଟି (46 ମିଲିୟନ୍) ୟୁନିଟ୍ ପାର୍ କରିଛି। ଏହି ପରିସଂଖ୍ୟାନ ସ୍ପଷ୍ଟ କରୁଛି ଯେ ଭାରତ ଏବେ ଗ୍ଲୋବାଲ ମାନୁଫ୍ୟାକ୍ଚରିଂ ମ୍ୟାପ୍ରେ ଚୀନ୍ର ଏକ ଶକ୍ତିଶାଳୀ ବିକଳ୍ପ ଭାବେ ଉଭା ହୋଇଛି।
