ସକାଳର ଶାନ୍ତ ପରିବେଶକୁ ଚିରି ଦେଲାଣି ରାଜନୈତିକ ଉତ୍ତେଜନା। ପଶ୍ଚିମବଙ୍ଗରେ ଆଜି ଫେଜ୍-2 ନିର୍ବାଚନ ପାଇଁ ଭୋଟିଂ ଆରମ୍ଭ ହେଉ ହେଉ ସ୍ଥିତି ବିଗିଡ଼ିବାରେ ଲାଗିଛି। ବୁଥ୍ ଗୁଡ଼ିକରେ ଭୋଟରଙ୍କ ଲମ୍ବା ଲାଇନ୍ ଲାଗିଥିବା ବେଳେ, ଗୋଟିଏ ପଟେ ବୁଥ୍ ବାହାରେ ମାରପିଟ୍ ଆଉ ଅନ୍ୟପଟେ ଇଭିଏମ୍ (EVM) ଖରାପ ହେବା ଘଟଣା ସାମ୍ନାକୁ ଆସିଛି।
ଛାପ୍ରା, ଶାନ୍ତିପୁର ଏବଂ ଭାଙ୍ଗର ଭଳି ଅଞ୍ଚଳରେ ସକାଳୁ ସକାଳୁ ହିଂସା ଏବଂ ଭଙ୍ଗାରୁଜା ଦେଖିବାକୁ ମିଳିଛି। ହାଓଡ଼ାର ବାଲି ଅଞ୍ଚଳରେ ଇଭିଏମ୍ ଖରାପ ହେବା ନେଇ ବଡ଼ ଧରଣର ଝଗଡ଼ା ହୋଇଛି। ସିଆରପିଏଫ୍ (CRPF) ଯବାନମାନେ ତୁରନ୍ତ ସ୍ପଟ୍ରେ ପହଞ୍ଚି ସ୍ଥିତି ନିୟନ୍ତ୍ରଣ କରିବା ସହ 2 ଜଣଙ୍କୁ ଅଟକ ରଖିଛନ୍ତି। ଛାପ୍ରା ବୁଥ୍ ପାଖରେ ହୋଇଥିବା ଗଣ୍ଡଗୋଳରେ ଜଣେ ଆଇଏସଏଫ୍ (ISF) ଏଜେଣ୍ଟ ମଧ୍ୟ ଆହତ ହୋଇଛନ୍ତି।
ସେପଟେ ଏଣ୍ଟାଲି ସିଟ୍ରେ ବିଜେପି (BJP) କ୍ୟାଣ୍ଡିଡେଟ୍ ପ୍ରିୟଙ୍କା ଟିବ୍ରେୱାଲ୍ଙ୍କର ପୁଲିସ୍ ଏବଂ ପୋଲିଂ ଅଫିସରଙ୍କ ସହ ଜୋରଦାର ପାଟିତୁଣ୍ଡ ହୋଇଛି। ରିପୋର୍ଟ ଅନୁସାରେ, ବୁଥ୍ ଛୋଟ ଥିବାରୁ ତାଙ୍କ ଏଜେଣ୍ଟଙ୍କୁ ବାହାର କରିଦିଆଯାଇଥିଲା। ଏହି ସମୟରେ ଟିଏମସି (TMC) ଏଜେଣ୍ଟ ମଧ୍ୟ ଝଗଡ଼ାରେ ପଶିଥିଲେ, ଯାହା ପରେ ସିକ୍ୟୁରିଟି ଫୋର୍ସ ଦୁଇ ଜଣଙ୍କୁ ବାହାର ରାସ୍ତା ଦେଖାଇ ଦେଇଥିଲେ। ବିରୋଧୀମାନେ ଭିତରେ 10 ଜଣ ଲୋକ ପୂରାଇ ବଟନ୍ ଦବାଇବାକୁ ଚେଷ୍ଟା କରୁଛନ୍ତି ବୋଲି ବିଜେପି କ୍ୟାଣ୍ଡିଡେଟ୍ ଅଭିଯୋଗ କରିଛନ୍ତି।
ଏସବୁ ଭିତରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ବିଜେପି ଉପରେ ଜୋରଦାର ବର୍ଷିଛନ୍ତି। କେନ୍ଦ୍ରୀୟ ସିକ୍ୟୁରିଟି ଫୋର୍ସ ବିଜେପି ଇସାରାରେ କାମ କରୁଛି ବୋଲି ସେ ସିଧାସଳଖ ଅଭିଯୋଗ କରିଛନ୍ତି। “କେନ୍ଦ୍ରୀୟ ଫୋର୍ସ ଆମ ଲୋକଙ୍କୁ ଟାର୍ଗେଟ୍ କରୁଛି… ଏମିତି ଭୋଟିଂ ହୋଇପାରିବ ନାହିଁ” ବୋଲି ମମତା କହିଛନ୍ତି। ବାହାରୁ ‘ଅବଜରଭର୍’ ଆଣି ବିଜେପି ନିର୍ବାଚନ ଜିତିବାକୁ ଷଡ଼ଯନ୍ତ୍ର କରୁଛି ବୋଲି ଦିଦି ସଙ୍ଗୀନ ଆରୋପ ଲଗାଇଛନ୍ତି।
