ମୁମ୍ବାଇ: ଚାମ୍ପିଅନ୍ସ ଟ୍ରଫି ଉପରେ ସମସ୍ତଙ୍କ ନଜର, ହେଲେ ତା’ ପୂର୍ବରୁ ବିସିସିଆଇ ଖେଳିଛି ଏକ ବଡ଼ ‘ଗୁଗଲି’। ନ୍ୟୁଜିଲ୍ୟାଣ୍ଡ ବିପକ୍ଷ ସିରିଜ୍ ପାଇଁ ପ୍ରସ୍ତୁତି ଜୋରଦାର ଚାଲିଥିବା ବେଳେ ଟିମ୍ ଲିଷ୍ଟ୍କୁ ନେଇ ଆସିଛି ବଡ଼ ଖବର। ରୋହିତ ଶର୍ମା ନୁହଁନ୍ତି, ବରଂ ଯୁବ ତାରକା ଶୁଭମନ ଗିଲ୍ଙ୍କ କାନ୍ଧରେ ରହିବ ଟିମ୍ର ଦାୟିତ୍ୱ। ସେପଟେ ଫ୍ୟାନ୍ସଙ୍କ ପାଇଁ ଟିକେ ନିରାଶାଜନକ ଖବର ମଧ୍ୟ ରହିଛି, କାରଣ ଦଳର ଦୁଇ ପ୍ରମୁଖ ଖେଳାଳି ଏହି ସିରିଜ୍ରେ ନଜର ଆସିବେ ନାହିଁ।
ଟାଇମ୍ସ ଅଫ୍ ଇଣ୍ଡିଆର ରିପୋର୍ଟ ଅନୁସାରେ, ନ୍ୟୁଜିଲ୍ୟାଣ୍ଡ ବିପକ୍ଷ ଆଗାମୀ ODI ସିରିଜ୍ ପାଇଁ ଶୁଭମନ ଗିଲ୍ଙ୍କୁ କ୍ୟାପଟେନ୍ କରାଯାଇପାରେ। ସିନିୟର ଖେଳାଳିମାନଙ୍କୁ ବିଶ୍ରାମ ଦେଇ ଯୁବ ଖେଳାଳିଙ୍କୁ ପରଖିବା ପାଇଁ ସିଲେକ୍ଟରମାନେ ଏଭଳି ପ୍ଲାନ କରୁଛନ୍ତି।
ସବୁଠାରୁ ବଡ଼ କଥା ହେଲା, ଟିମ୍ର ମୁଖ୍ୟ ବୋଲର ଯଶପ୍ରୀତ ବୁମରା ଏବଂ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କୁ ଏହି ସିରିଜ୍ରୁ ‘ରେଷ୍ଟ’ ଦିଆଯିବାର ସମ୍ଭାବନା ରହିଛି। ଆଗକୁ ଚାମ୍ପିଅନ୍ସ ଟ୍ରଫି ଥିବାରୁ ଏହି ଦୁଇ ଷ୍ଟାର୍ ଖେଳାଳିଙ୍କ ୱାର୍କ-ଲୋଡ୍ ମ୍ୟାନେଜମେଣ୍ଟ ଉପରେ ବୋର୍ଡ ଗୁରୁତ୍ୱ ଦେଉଛି। ଲଗାତାର କ୍ରିକେଟ୍ ଖେଳୁଥିବାରୁ ସେମାନଙ୍କୁ ଫିଟ୍ ରଖିବା ଏବେ ଦଳ ପାଇଁ ଚ୍ୟାଲେଞ୍ଜ ହୋଇଛି।
ଏହି ସିରିଜ୍ରେ ଋଷଭ ପନ୍ତଙ୍କ ଉପରେ ମଧ୍ୟ ନଜର ରହିବ। ତେବେ ଗିଲ୍ଙ୍କ ନେତୃତ୍ୱରେ ଯୁବ ବାହିନୀ କିଭଳି ପ୍ରଦର୍ଶନ କରୁଛି, ତାହା ଦେଖିବା ପାଇଁ କ୍ରିକେଟ୍ ପ୍ରେମୀମାନେ ଅପେକ୍ଷା କରିଛନ୍ତି। ଖୁବଶୀଘ୍ର ବିସିସିଆଇ ପକ୍ଷରୁ ଅଫିସିଆଲ୍ ସ୍କ୍ୱାଡ୍ ଘୋଷଣା କରାଯିବ ବୋଲି ଆଶା କରାଯାଉଛି।
