ଭାବନ୍ତୁ ତ, ଆପଣ ଆପଣଙ୍କର ଦାମୀ ଲକଜୁରି କାର୍ ଧରି ହାଇୱେରେ ଫୁଲ୍ ସ୍ପିଡ୍ରେ ଯାଉଛନ୍ତି ଆଉ ହଠାତ୍ ଗାଡ଼ିର ଇଞ୍ଜିନ ବନ୍ଦ ହୋଇଗଲା। କେତେ ଭୟଙ୍କର ହେବ ସେହି ସିଚୁଏସନ? ଏଭଳି ଏକ ସିରିୟସ ସମସ୍ୟାକୁ ନେଇ ଏବେ ଚିନ୍ତାରେ ଦୁନିଆର ପ୍ରସିଦ୍ଧ କାର୍ ମେକର ଜାଗୁଆର ଲ୍ୟାଣ୍ଡ ରୋଭର (JLR)।
ଗାଡ଼ିରେ ଯାନ୍ତ୍ରିକ ତ୍ରୁଟି ଯୋଗୁଁ କମ୍ପାନୀ ଏକାସାଙ୍ଗରେ ପ୍ରାୟ 1.7 ଲକ୍ଷ କାର୍କୁ ରିକଲ୍ କରିବାକୁ ନିଷ୍ପତ୍ତି ନେଇଛି। କମ୍ପାନୀ ପକ୍ଷରୁ କୁହାଯାଇଛି ଯେ, ଗାଡ଼ି ଚାଲୁଥିବା ସମୟରେ ହଠାତ୍ ‘ପାୱାର ଲସ୍’ (Power Loss) ହୋଇଯାଉଛି, ଯାହା ଫଳରେ ଗାଡ଼ି ଅଧା ରାସ୍ତାରେ ଠପ୍ ହୋଇଯିବାର ବିପଦ ରହିଛି। ବିଶେଷ କରି ହାଇୱେରେ ଗାଡ଼ି ଚଲାଉଥିବା ବେଳେ ଏହା ଏକ ବଡ଼ ଆକ୍ସିଡେଣ୍ଟର କାରଣ ସାଜିପାରେ।
ଏହି ସମସ୍ୟାର ମୂଳ କାରଣ ହେଉଛି ଗାଡ଼ିର ‘କ୍ରାଙ୍କସାଫ୍ଟ ପୋଜିସନ ସେନ୍ସର’ (Crankshaft Position Sensor)। ଏହି ସେନ୍ସରଟି ଖରାପ ଥିବାରୁ ଇଞ୍ଜିନକୁ ସଠିକ୍ ସିଗନାଲ ମିଳିପାରୁ ନାହିଁ, ଯାହା ଫଳରେ ଗାଡ଼ି କୌଣସି ୱାର୍ଣ୍ଣିଂ ନଥାଇ ହଠାତ୍ ବନ୍ଦ ହୋଇଯାଉଛି।
ଏହି ରିକଲ୍ ଲିଷ୍ଟରେ ଜାଗୁଆରର ପପୁଲାର ମଡେଲ XE, XF, ଏବଂ F-Pace ରହିଛି। ସେହିପରି ଲ୍ୟାଣ୍ଡ ରୋଭରର ଡିସ୍କଭରି ସ୍ପୋର୍ଟ (Discovery Sport) ଏବଂ ରେଞ୍ଜ ରୋଭର ଇଭୋକ (Range Rover Evoque) ଭଳି ମଡେଲ ମଧ୍ୟ ଏଥିରେ ସାମିଲ ଅଛି। 2018 ରୁ 2020 ମସିହା ମଧ୍ୟରେ ତିଆରି ହୋଇଥିବା ଏହି ଗାଡ଼ିଗୁଡ଼ିକରେ ଏହି ପ୍ରୋବଲେମ ଦେଖାଦେଇଛି।
ତେବେ ସବୁଠାରୁ ଆଶ୍ଚର୍ଯ୍ୟର କଥା ହେଉଛି, ଏହି ପ୍ରୋବଲେମର କୌଣସି ସମାଧାନ ବା ‘ଫିକ୍ସ’ (Fix) ଏପର୍ଯ୍ୟନ୍ତ କମ୍ପାନୀ ପାଖରେ ନାହିଁ। ବର୍ତ୍ତମାନ ପାଇଁ କେବଳ ଗାଡ଼ି ମାଲିକମାନଙ୍କୁ ସାବଧାନ କରିବା ପାଇଁ ଏହି ରିକଲ୍ ପ୍ରୋସେସ୍ ଆରମ୍ଭ ହୋଇଛି। ଯେତେବେଳେ କମ୍ପାନୀ ପାଖରେ ଏହାର ଟେକ୍ନିକାଲ ସଲ୍ୟୁସନ ଆସିଯିବ, ସେତେବେଳେ ଗ୍ରାହକଙ୍କୁ ଖବର ଦିଆଯିବ ଏବଂ ଫ୍ରି-ଅଫ୍-କଷ୍ଟରେ ଗାଡ଼ି ସଜାଡ଼ି ଦିଆଯିବ ବୋଲି ଜଣାପଡ଼ିଛି। ଯଦି ଆପଣଙ୍କ ପାଖରେ ଏହି ମଡେଲର ଗାଡ଼ି ଅଛି, ତେବେ କମ୍ପାନୀର ଅଫିସିଆଲ ମେସେଜକୁ ଅପେକ୍ଷା କରନ୍ତୁ।
