ନୂଆଦିଲ୍ଲୀ: ରାସ୍ତା ଉପରେ ଚାରିଆଡ଼େ ନୂଆ ନୂଆ ଗାଡ଼ିର ଲମ୍ବା ଲାଇନ୍। ଶୋ-ରୁମ୍ରେ ଗ୍ରାହକଙ୍କ ଭିଡ଼। କାହାର ଏସ୍ୟୁଭି (SUV) ପସନ୍ଦ ତ କାହାର ଇଭି (EV)। 2025 ବର୍ଷଟା ଭାରତୀୟ ଅଟୋମୋବାଇଲ୍ ମାର୍କେଟ୍ ପାଇଁ ପୁରା ଦମ୍ଦାର୍ ରହିଛି। ହେଲେ ଏହି ‘ସେଲ୍ସ’ ରେସ୍ରେ ମାରୁତି ସୁଜୁକି ଏବେ ବି ନିଜର ଗଡ଼ ରକ୍ଷା କରିଥିବା ବେଳେ ମହିନ୍ଦ୍ରା ସମସ୍ତଙ୍କୁ ଚକିତ କରି ବଡ଼ ଜମ୍ପ୍ ମାରିଛି।
ମାରୁତିର ଏକଛତ୍ରବାଦ ଶାସନ
ଭାରତୀୟ ମଧ୍ୟବିତ୍ତ ପରିବାରର ପ୍ରଥମ ପସନ୍ଦ ଏବେ ବି ମାରୁତି ସୁଜୁକି। 2025 କ୍ୟାଲେଣ୍ଡର ବର୍ଷରେ କମ୍ପାନୀ ପ୍ରାୟ 17.86 ଲକ୍ଷ ୟୁନିଟ୍ ଗାଡ଼ି ବିକ୍ରି କରି ନମ୍ବର 1 ସ୍ଥାନରେ ରହିଛି। ପୁରା ମାର୍କେଟ୍ର ପ୍ରାୟ 40% ଶେୟାର ଏକାକୀ ମାରୁତି କବ୍ଜା କରି ରଖିଛି। ଅର୍ଥାତ୍ ରାସ୍ତାରେ ଚାଲୁଥିବା ପ୍ରତି 10ଟି କାର୍ ମଧ୍ୟରୁ 4ଟି କେବଳ ମାରୁତିର।
ମହିନ୍ଦ୍ରାର ଦମ୍, ଟାଟା-ହ୍ୟୁଣ୍ଡାଇ ଫେଲ୍
ଏଥର ମାର୍କେଟ୍ରେ ସବୁଠୁ ବଡ଼ ଖବର ହେଉଛି ମହିନ୍ଦ୍ରାର ଉତ୍ଥାନ। ସ୍କର୍ପିଓ (Scorpio), ଥାର୍ (Thar) ଏବଂ ନୂଆ ଇଲେକ୍ଟ୍ରିକ୍ ଗାଡ଼ିର କ୍ରେଜ୍ ଯୋଗୁଁ ମହିନ୍ଦ୍ରା ଏବେ ଦେଶର 2 ନମ୍ବର କାର୍ କମ୍ପାନୀ ବନିଯାଇଛି। 5.93 ଲକ୍ଷ ୟୁନିଟ୍ ଗାଡ଼ି ବିକି ମହିନ୍ଦ୍ରା ଏବେ ଟାଟା ଏବଂ ହ୍ୟୁଣ୍ଡାଇକୁ ପଛରେ ପକାଇ ଦେଇଛି। ସେହିପରି ଟାଟା ମୋଟର୍ସ 5.68 ଲକ୍ଷ ୟୁନିଟ୍ ସହ 3 ନମ୍ବର ସ୍ଥାନରେ ରହିଛି। ହ୍ୟୁଣ୍ଡାଇ କମ୍ପାନୀ ଏଥର 4 ନମ୍ବର ସ୍ଥାନକୁ ଖସି ଆସିଛି।
ଟପ୍ 10 କାର୍ କମ୍ପାନୀ (CY2025 ରିପୋର୍ଟ):
| Rank | Carmaker | CY2025 Sales | Market Share (%) |
| 1 | Maruti Suzuki | 17,86,226 | 39.91 |
| 2 | Mahindra | 5,92,771 | 13.25 |
| 3 | Tata | 5,67,607 | 12.68 |
| 4 | Hyundai | 5,59,558 | 12.50 |
| 5 | Toyota | 3,20,703 | 7.17 |
| 6 | Kia | 2,59,043 | 5.79 |
| 7 | Skoda Volkswagen | 1,08,277 | 2.42 |
| 8 | MG | 65,614 | 1.47 |
| 9 | Honda | 62,576 | 1.40 |
| 10 | Renault | 36,420 | 0.81 |
ଇଭି (EV) ମାର୍କେଟ୍ରେ ବଢୁଛି ଜୋର୍
ମହିନ୍ଦ୍ରାର ଏହି ସଫଳତା ପଛରେ ଏସ୍ୟୁଭି ଗାଡ଼ି ଗୁଡ଼ିକର ବଡ଼ ହାତ ରହିଛି। ଏହା ସହିତ କମ୍ପାନୀର ଇଲେକ୍ଟ୍ରିକ୍ ଗାଡ଼ି ଗୁଡ଼ିକ ବି ଭଲ କାମ କରିଛନ୍ତି। ଅନ୍ୟପଟେ ଟାଟା ମୋଟର୍ସ ମଧ୍ୟ ପଞ୍ଚ (Punch) ଏବଂ ନେକ୍ସନ୍ (Nexon) ସାହାଯ୍ୟରେ ମାର୍କେଟ୍ରେ ନିଜର ଦବଦବା ଜାରି ରଖିଛି। ତେବେ ହ୍ୟୁଣ୍ଡାଇ ପାଇଁ ନୂଆ ମଡେଲ୍ ଅଭାବରୁ ସେଲ୍ସ ଟିକେ ପ୍ରଭାବିତ ହୋଇଥିବା ଦେଖାଯାଇଛି।
