ଭୁବନେଶ୍ୱର: ଆକାଶରୁ ଯେମିତି ନିଆଁ ବର୍ଷୁଛି। ସକାଳ 9ଟା ବାଜିଲେ ବାହାରକୁ ଗୋଡ଼ କାଢ଼ିବା ମୁସ୍କିଲ୍ ହୋଇପଡ଼ିଲାଣି। ତାତି ଏମିତି କଲବଲ କରୁଛି ଯେ ଘରୁ ବାହାରିଲେ ଦେହ ପୋଡ଼ି ଯାଉଛି। ଏହି ପ୍ରଚଣ୍ଡ ରୌଦ୍ରତାପରେ ସବୁଠୁ ଅଧିକ ହନ୍ତସନ୍ତ ହେଉଥିଲେ ସ୍କୁଲ ଯାଉଥିବା କୁନି କୁନି ପିଲା। ଶେଷରେ ଅଭିଭାବକଙ୍କ ଚିନ୍ତା ଆଉ ପିଲାଙ୍କ କଷ୍ଟକୁ ଦେଖି ରାଜ୍ୟ ସରକାର ବଡ଼ ନିଷ୍ପତ୍ତି ନେଇଛନ୍ତି। ଆସନ୍ତା ଏପ୍ରିଲ 27 ତାରିଖରୁ ଓଡ଼ିଶାର ସବୁ ସ୍କୁଲରେ ‘ସମର ଭାକେସନ’ ବା ଖରା ଛୁଟି ଆରମ୍ଭ ହେବ।
ସୂଚନା ଅନୁସାରେ, ରାଜ୍ୟରେ ଜାରି ରହିଥିବା ଭୟଙ୍କର ‘ହଟ୍ ୱେଭ୍’ ସ୍ଥିତିକୁ ଦୃଷ୍ଟିରେ ରଖି ସରକାର ଏହି ଡିସିସନ ନେଇଛନ୍ତି। ଏପ୍ରିଲ 27 ରୁ ସବୁ ସରକାରୀ, ସରକାରୀ ଅନୁଦାନପ୍ରାପ୍ତ ଏବଂ ଘରୋଇ ସ୍କୁଲ ବନ୍ଦ ରହିବ। ତେବେ ଛୁଟି ହେବା ପୂର୍ବରୁ ଅର୍ଥାତ୍ ଏପ୍ରିଲ 26 ତାରିଖ ଯାଏଁ ସକାଳୁଆ ସ୍କୁଲ ଜାରି ରହିବ। ପିଲାମାନେ ସକାଳ 7:00 ରୁ 11:30 ଯାଏଁ ସ୍କୁଲରେ କ୍ଲାସ କରିବେ।
ଗତ କିଛି ଦିନ ହେବ ରାଜ୍ୟର ଅଧିକାଂଶ ସହରରେ ତାପମାତ୍ରା 40 ଡିଗ୍ରୀ ଉପରେ ରହୁଛି। କିଛି ଜାଗାରେ ତ ପାରଦ 45 ଡିଗ୍ରୀ ବି ଟପିଲାଣି। ଏମିତି ସ୍ଥିତିରେ ପିଲାମାନେ ସ୍କୁଲରୁ ଫେରିବା ବେଳକୁ ଅଂଶୁଘାତର ଭୟ ରହୁଥିଲା। ଏହାକୁ ନେଇ ସୋସିଆଲ ମିଡିଆଠୁ ଆରମ୍ଭ କରି ସବୁଠି ଛୁଟି ପାଇଁ ଡିମାଣ୍ଡ ହେଉଥିଲା। ପାଣିପାଗ ବିଭାଗର ରିପୋର୍ଟ ଅନୁସାରେ ଆଗକୁ ତାତି ଆହୁରି ବଢ଼ିବାର ଚାନ୍ସ ଅଛି। ତେଣୁ ପିଲାଙ୍କ ସ୍ୱାସ୍ଥ୍ୟକୁ ପ୍ରାୟୋରିଟି ଦେଇ ସରକାର ଆଗୁଆ ଛୁଟି ଘୋଷଣା କରିଛନ୍ତି। ଏହି ଖବର ପରେ ଅଭିଭାବକ ଓ ଛାତ୍ରଛାତ୍ରୀଙ୍କ ମହଲରେ ବଡ଼ ଆଶ୍ୱସ୍ତି ଦେଖିବାକୁ ମିଳିଛି।
