ଭୁବନେଶ୍ୱର: ସିନେମା ହଲ୍ରେ ଏବେ ବି ‘ଧୁରନ୍ଧର’ର କ୍ରେଜ୍ କମିନି। ରଣବୀର ସିଂହଙ୍କ ଆକ୍ସନ ଅବତାର ଏବଂ ଦେଶଭକ୍ତିର ଜୋସ୍ ଦେଖି ଦର୍ଶକ ପାଗଳ ପ୍ରାୟ। ଟିକେଟ୍ କାଉଣ୍ଟରରେ ଟଙ୍କାର ବର୍ଷା କରି ରେକର୍ଡ ଭାଙ୍ଗିଥିବା ଏହି ବ୍ଲକବଷ୍ଟର ଫିଲ୍ମ ଏବେ ଖୁବ୍ ଶୀଘ୍ର ଆପଣଙ୍କ ମୋବାଇଲ୍ ଓ ଟିଭି ସ୍କ୍ରିନ୍କୁ ଆସିବାକୁ ପ୍ରସ୍ତୁତ। ଯଦି ଆପଣ ଥିଏଟରରେ ଏହି ମେଗା ମୁଭିକୁ ମିସ୍ କରିଛନ୍ତି, ତେବେ ଆପଣଙ୍କ ପାଇଁ ଏକ ବଡ଼ ଖୁସି ଖବର ଅଛି।
2025 ଡିସେମ୍ବର 5 ରେ ରିଲିଜ୍ ହୋଇଥିବା ନିର୍ଦ୍ଦେଶକ ଆଦିତ୍ୟ ଧରଙ୍କ ଏହି ସ୍ପାଏ ଆକ୍ସନ ଥ୍ରୀଲର ‘ଧୁରନ୍ଧର’ ବକ୍ସ ଅଫିସରେ ଇତିହାସ ରଚିଛି। ବିଶ୍ୱବ୍ୟାପୀ 1000 କୋଟିରୁ ଅଧିକ ଟଙ୍କା କଲେକ୍ସନ କରି ଏହା 2025 ବର୍ଷର ସବୁଠାରୁ ବଡ଼ ହିଟ୍ ଫିଲ୍ମ ପାଲଟିଛି। ଥିଏଟରରେ ଏହି ଅଦ୍ଭୁତପୂର୍ବ ସଫଳତା ପରେ, ଏବେ ଫିଲ୍ମର OTT ରିଲିଜ୍କୁ ନେଇ ଚର୍ଚ୍ଚା ଜୋର ଧରିଛି। ମିଳିଥିବା ରିପୋର୍ଟ ଅନୁସାରେ, OTT ପ୍ଲାଟଫର୍ମ ନେଟଫ୍ଲିକ୍ସ (Netflix) ଏହି ଫିଲ୍ମର ଡିଜିଟାଲ୍ ରାଇଟ୍ସକୁ ଏକ ମୋଟା ଅଙ୍କର ଫି’ ଦେଇ କିଣି ନେଇଛି।
ସୂଚନା ମୁତାବକ, ଜାନୁଆରୀ 30, 2026 ଆଖପାଖରେ ‘ଧୁରନ୍ଧର’ ନେଟଫ୍ଲିକ୍ସରେ ପ୍ରିମିୟର ହୋଇପାରେ। ସବୁଠାରୁ ବଡ଼ କଥା ହେଲା, ନେଟଫ୍ଲିକ୍ସ କେବଳ ପ୍ରଥମ ଭାଗ ନୁହେଁ, ବରଂ ଏହି ଫ୍ରାଞ୍ଚାଇଜ୍ର ଉଭୟ ଭାଗ (Part 1 & Part 2) ର ଏକ୍ସକ୍ଲୁସିଭ୍ ଷ୍ଟ୍ରିମିଂ ରାଇଟ୍ସ ହାସଲ କରିଛି। ଥିଏଟରରେ ଫିଲ୍ମଟି ଯେପରି ମ୍ୟାକ୍ସିମମ୍ ବିଜନେସ୍ କରିପାରିବ, ସେଥିପାଇଁ OTT ରିଲିଜ୍ରେ ଟିକେ ବ୍ୟବଧାନ ରଖାଯାଇଛି। ଖୁବ୍ ଶୀଘ୍ର ନେଟଫ୍ଲିକ୍ସ ତରଫରୁ ଏନେଇ ଅଫିସିଆଲ୍ ଘୋଷଣା କରାଯିବାର ସମ୍ଭାବନା ରହିଛି।
‘ଧୁରନ୍ଧର’ର କାହାଣୀ ବାସ୍ତବ ଘଟଣା ଉପରେ ଆଧାରିତ, ଯାହା ଦର୍ଶକଙ୍କୁ ବେଶ୍ ପସନ୍ଦ ଆସିଛି। ଏଥିରେ ରଣବୀର ସିଂହ ଜଣେ RAW ଏଜେଣ୍ଟ ହମଜା ଅଲି ମଜାରି ଭୂମିକାରେ ନଜର ଆସିଛନ୍ତି। ସେ ପାକିସ୍ତାନର କରାଚିରେ ଥିବା କୁଖ୍ୟାତ ଲିଆରି ଅଣ୍ଡରୱାର୍ଲ୍ଡରେ ଜଣେ ବାଲୋଚ୍ ଗ୍ୟାଙ୍ଗଷ୍ଟର ବେଶରେ ପ୍ରବେଶ କରୁଛନ୍ତି। ତାଙ୍କର ମିଶନ୍ ହେଉଛି ଭାରତ ଉପରେ ହୋଇଥିବା ବଡ଼ ଧରଣର ଆତଙ୍କବାଦୀ ଆକ୍ରମଣ ସହ ଜଡିତ ନେଟୱାର୍କକୁ ଧ୍ୱଂସ କରିବା। ଏହି ଫିଲ୍ମଟି IC-814 ବିମାନ ହାଇଜାକ୍, 2001 ସଂସଦ ଆକ୍ରମଣ ଏବଂ 26/11 ମୁମ୍ବାଇ ଆକ୍ରମଣ ଭଳି ସମ୍ବେଦନଶୀଳ ସତ୍ୟ ଘଟଣାରୁ ପ୍ରେରଣା ନେଇ ନିର୍ମାଣ କରାଯାଇଛି।
ଫିଲ୍ମରେ ରଣବୀରଙ୍କ ଦମଦାର ଆକ୍ସନ ସହିତ ଅକ୍ଷୟ ଖାନ୍ନା, ସଞ୍ଜୟ ଦତ୍ତ, ଆର୍. ମାଧବନ୍ ଏବଂ ଅର୍ଜୁନ ରାମପାଲଙ୍କ ଭଳି ଭେଟେରାନ କଳାକାରଙ୍କ ଅଭିନୟ ଦେଖିବାକୁ ମିଳିଛି। କ୍ରିଟିକ୍ସମାନେ ବିଶେଷକରି ରଣବୀର ଏବଂ ଅକ୍ଷୟ ଖାନ୍ନାଙ୍କ ପରଫରମାନ୍ସକୁ ବେଶ୍ ପ୍ରଶଂସା କରିଛନ୍ତି। ଫିଲ୍ମର ପ୍ରଥମ ଭାଗ ଏକ ବଡ଼ ସସପେନ୍ସ ସହ ଶେଷ ହୋଇଛି। ଦର୍ଶକମାନେ ଏବେ ‘ଧୁରନ୍ଧର ପାର୍ଟ 2’ ପାଇଁ ଅପେକ୍ଷା କରିଛନ୍ତି, ଯାହା ମାର୍ଚ୍ଚ 19, 2026 ରେ ସିନେମା ହଲ୍ରେ ରିଲିଜ୍ ହେବ। ତେବେ ଦ୍ୱିତୀୟ ଭାଗ ଆସିବା ପୂର୍ବରୁ ପ୍ରଥମ ଭାଗକୁ OTT ରେ ଦେଖିବାର ସୁଯୋଗ ଫ୍ୟାନ୍ସଙ୍କ ପାଇଁ ଏକ ବଡ଼ ଉପହାର ହେବ।
