ନୂଆଦିଲ୍ଲୀ: ଟେକ୍ ଦୁନିଆରେ ଏବେ କେବଳ ଗୋଟିଏ ଚର୍ଚ୍ଚା, ତାହା ହେଉଛି ସାମସଙ୍ଗର ଆଗାମୀ ଫ୍ଲାଗସିପ୍ ଫୋନ୍ ‘Galaxy S26 Ultra’। ଗ୍ୟାଜେଟ୍ ପ୍ରେମୀମାନେ ଅପେକ୍ଷା କରିଛନ୍ତି କେବେ ଆସିବ ଏହି ଦମଦାର୍ ସ୍ମାର୍ଟଫୋନ୍। ଶେଷରେ ଏହାକୁ ନେଇ ବଡ଼ ଅପଡେଟ୍ ସାମ୍ନାକୁ ଆସିଛି। ଲିକ୍ ହୋଇଥିବା ରିପୋର୍ଟରୁ ଜଣାପଡିଛି ଯେ ଏଥର କମ୍ପାନୀ ଫୋନ୍ର ଡିଜାଇନ୍ରେ ବଡ଼ ପରିବର୍ତ୍ତନ କରିବାକୁ ଯାଉଛି।
ଖବର ଅନୁସାରେ, ଆସନ୍ତା ବର୍ଷ ଅର୍ଥାତ୍ 2026 ମସିହା ଫେବୃଆରୀ 25 ତାରିଖରେ ସାମସଙ୍ଗ ନିଜର ‘Galaxy Unpacked’ ଇଭେଣ୍ଟରେ ଏହି ଫୋନ୍ ଲଞ୍ଚ୍ କରିପାରେ। ସାନ ଫ୍ରାନ୍ସିସ୍କୋରେ ହେବାକୁ ଥିବା ଏହି ଗ୍ରାଣ୍ଡ ଇଭେଣ୍ଟ ପରେ ମାର୍ଚ୍ଚ ମାସ ଆରମ୍ଭରୁ ଏହାର ସେଲ୍ ଆରମ୍ଭ ହେବାର ସମ୍ଭାବନା ରହିଛି।
ଏଥର S26 Ultraରେ ସବୁଠାରୁ ବଡ଼ ପରିବର୍ତ୍ତନ ଏହାର ଲୁକ୍ରେ ଦେଖିବାକୁ ମିଳିବ। ଡମି ୟୁନିଟ୍ର ଫଟୋରୁ ଜଣାପଡିଛି ଯେ ନୂଆ ଫୋନ୍ ଆଗ ଅପେକ୍ଷା ଆହୁରି ପତଳା (7.9mm) ହେବ ଏବଂ ଏହାର କୋଣଗୁଡିକ ରାଉଣ୍ଡ୍ (rounded corners) ରହିବ। S25 Ultra ଭଳି ଏଥିରେ ମଧ୍ୟ ମଜଭୁତ ଟାଇଟାନିୟମ୍ ଫ୍ରେମ୍ ବ୍ୟବହାର କରାଯିବ।
ତେବେ ସବୁଠାରୁ ବଡ଼ କଥା ହେଲା, ପଛପଟେ ଥିବା କ୍ୟାମେରା ଡିଜାଇନ୍ ବଦଳିଯିବ। ଆଗ ଭଳି ଲେନ୍ସଗୁଡିକ ଆଉ ଅଲଗା ଅଲଗା ରହିବ ନାହିଁ, ବରଂ Galaxy Z Fold ଭଳି ଏକ ଏକକ କ୍ୟାମେରା ମଡ୍ୟୁଲ୍ ଭିତରେ ସବୁ ଲେନ୍ସ ରହିବ, ଯାହା ଫୋନ୍କୁ ଏକ ନୂଆ ଏବଂ କ୍ଲିନ୍ ଲୁକ୍ ଦେବ।
ଏହାର ଫିଚର୍ସ ମଧ୍ୟ ବହୁତ ଜବରଦସ୍ତ ରହିବ। ଏଥିରେ 6.9 ଇଞ୍ଚର ବିଶାଳ Dynamic LTPO AMOLED ଡିସପ୍ଲେ ମିଳିବ, ଯାହା 120Hz ରିଫ୍ରେଶ୍ ରେଟ୍ ସହ ଆସିବ। ପରଫରମାନ୍ସ ପାଇଁ ଏଥିରେ ସବୁଠାରୁ ଶକ୍ତିଶାଳୀ Qualcomm Snapdragon 8 Elite Gen 5 ଚିପସେଟ୍ ଲାଗିବ। ଏହା ସହିତ 16GB ପର୍ଯ୍ୟନ୍ତ RAM ଏବଂ 1TB ଷ୍ଟୋରେଜ୍ ଅପ୍ସନ୍ ମିଳିପାରେ।
କ୍ୟାମେରା କଥା କହିବାକୁ ଗଲେ ଏହା ଏକ ‘ବିଷ୍ଟ୍’ (beast) ସାବ୍ୟସ୍ତ ହେବ। ଏଥିରେ 200MPର ମେନ୍ କ୍ୟାମେରା, 50MPର ଅଲଟ୍ରାୱାଇଡ୍ ଏବଂ ଦୁଇଟି ଶକ୍ତିଶାଳୀ ଟେଲିଫୋଟୋ ଲେନ୍ସ (50MP 5x ଜୁମ୍ ଏବଂ 12MP 3x ଜୁମ୍) ରହିବ।
ଭାରତୀୟ ଗ୍ରାହକଙ୍କ ପାଇଁ ଖୁସି ଖବର ଯେ, ଏତେ ସବୁ ନୂଆ ଫିଚର୍ସ ସତ୍ତ୍ୱେ କମ୍ପାନୀ ଏହାର ଦାମ୍ ବଢାଇବ ନାହିଁ ବୋଲି ଶୁଣିବାକୁ ମିଳୁଛି। ରିପୋର୍ଟ ମୁତାବକ, ଭାରତରେ ଏହାର ପ୍ରାରମ୍ଭିକ ମୂଲ୍ୟ ପାଖାପାଖି 1,29,999 ଟଙ୍କା ରହିପାରେ।
