ନୂଆଦିଲ୍ଲୀ: ଚାରିଆଡ଼େ ଗୋଟିଏ ଚର୍ଚ୍ଚା, ଆରାବଳୀ ପାହାଡ଼ ବଞ୍ଚିବ ତ? ପରିବେଶବିତ୍ଙ୍କ ମନରେ ଛନକା ପଶିଥିଲା ଯେ, ନୂଆ ନିୟମ ଆସିଲେ ପାହାଡ଼ କୁଆଡ଼େ ଗାଏବ ହୋଇଯିବ। ହେଲେ ଏବେ ସେହି ଆଶଙ୍କା ଉପରେ ସାମୟିକ ବିରାମ ଲାଗିଛି। ଆରାବଳୀ ପାହାଡ଼ର ସୀମା ନିର୍ଦ୍ଧାରଣକୁ ନେଇ ସୁପ୍ରିମକୋର୍ଟ ନିଜ ପୁରୁଣା ରାୟ ଉପରେ ‘ଷ୍ଟେ’ (Stay) ଲଗାଇଛନ୍ତି। ଆଉ ସବୁଠୁ ବଡ଼ କଥା ହେଲା, କେନ୍ଦ୍ର ପରିବେଶ ମନ୍ତ୍ରୀ ଭୂପେନ୍ଦ୍ର ଯାଦବ ଏହାକୁ ଖୋଲା ମନରେ ସ୍ୱାଗତ କରିଛନ୍ତି।
ସୋମବାର ଦିନ କେନ୍ଦ୍ରମନ୍ତ୍ରୀ ଭୂପେନ୍ଦ୍ର ଯାଦବ କହିଛନ୍ତି ଯେ, ସରକାର ଆରାବଳୀର ସୁରକ୍ଷା ପାଇଁ ସମ୍ପୂର୍ଣ୍ଣ ପ୍ରତିଶ୍ରୁତିବଦ୍ଧ। ସୁପ୍ରିମକୋର୍ଟ ଏହି ମାମଲାର ଅନୁଧ୍ୟାନ ପାଇଁ ଯେଉଁ ନୂଆ କମିଟି ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି, ପରିବେଶ ମନ୍ତ୍ରଣାଳୟ (MOEFCC) ସେହି କମିଟିକୁ ସବୁ ପ୍ରକାର ସାହାଯ୍ୟ ଯୋଗାଇଦେବ। “ଆମେ କୋର୍ଟଙ୍କ ନିଷ୍ପତ୍ତିକୁ ସମ୍ମାନ ଜଣାଉଛୁ ଏବଂ ଆରାବଳୀକୁ ବଞ୍ଚାଇବା ପାଇଁ ତଥା ଏହାର ପୁନରୁଦ୍ଧାର ପାଇଁ ଯାହା ଦରକାର ତାହା କରିବୁ,” ବୋଲି ମନ୍ତ୍ରୀ ନିଜ ‘X’ (ଟୁଇଟର) ହ୍ୟାଣ୍ଡେଲରେ ଲେଖିଛନ୍ତି।
ମନ୍ତ୍ରୀ ଆହୁରି ମଧ୍ୟ କ୍ଲିଅର୍ କରିଛନ୍ତି ଯେ, ମାଇନିଂ (Mining) ବା ଖଣି ଖନନ ଉପରେ କଟକଣା ପୂର୍ବଭଳି ଜାରି ରହିବ। ନୂଆ ମାଇନିଂ ଲିଜ୍ ଦିଆଯିବ ନାହିଁ କି ପୁରୁଣା ଲିଜ୍ର ନବୀକରଣ ହେବ ନାହିଁ। ଏନେଇ କୌଣସି ବୁଝାମଣା କରାଯିବ ନାହିଁ ବୋଲି ସେ ସ୍ପଷ୍ଟ କରିଛନ୍ତି। କିଛି ଦିନ ତଳେ ଏକ ପ୍ରେସ୍ କନଫରେନ୍ସରେ ମଧ୍ୟ ସେ ଏକଥା ଦୋହରାଇଥିଲେ।
ସୂଚନାଯୋଗ୍ୟ ଯେ, ଗତ ନଭେମ୍ବର ମାସରେ ସୁପ୍ରିମକୋର୍ଟ ଏକ ରାୟ ଦେଇଥିଲେ ଯେଉଁଥିରେ ଆରାବଳୀ ପାହାଡ଼ର ଏକ ‘ନୂଆ ଡେଫିନେସନ୍’ (New Definition) ସ୍ଥିର କରାଯାଇଥିଲା। ଏଥିରେ କୁହାଯାଇଥିଲା ଯେ, କେବଳ ୧୦୦ ମିଟରରୁ ଅଧିକ ଉଚ୍ଚତା ବିଶିଷ୍ଟ ପାହାଡ଼କୁ ହିଁ ଆରାବଳୀର ଅଂଶ ବୋଲି ଧରାଯିବ। ଏହାକୁ ନେଇ ସାରା ଦେଶରେ ବିବାଦ ଜୋର୍ ଧରିଥିଲା। ପରିବେଶବିତ୍ମାନେ ଅଭିଯୋଗ କରିଥିଲେ ଯେ, ଏହି ନିୟମ ଲାଗୁ ହେଲେ ଅନେକ ଛୋଟ ପାହାଡ଼ ଓ ଜଙ୍ଗଲ ଜମି ସୁରକ୍ଷା ବଳୟରୁ ବାହାରିଯିବ ଏବଂ ସେଠାରେ ବିଲ୍ଡର ଓ ମାଇନିଂ ମାଫିଆମାନେ କବ୍ଜା କରିନେବେ। କିନ୍ତୁ ଏବେ କୋର୍ଟଙ୍କ ‘ଷ୍ଟେ’ ଅର୍ଡର ପରେ ପରିବେଶ ପ୍ରେମୀଙ୍କୁ ସାମାନ୍ୟ ଆଶ୍ୱସ୍ତି ମିଳିଛି।
