ନୂଆଦିଲ୍ଲୀ: ଭାରତୀୟ ରାସ୍ତାରେ ଗୋଟିଏ ଗାଡ଼ିର ସାମ୍ରାଜ୍ୟ ଦୀର୍ଘ 2 ଦଶନ୍ଧି ଧରି ଚାଲିଛି। ଲମ୍ବା ଫ୍ୟାମିଲି ଟ୍ରିପ୍ ହେଉ କିମ୍ବା ଏୟାରପୋର୍ଟ ଟ୍ୟାକ୍ସି ଷ୍ଟାଣ୍ଡ, ଅଥବା କୌଣସି ନେତା ମନ୍ତ୍ରୀଙ୍କ ଭିଆଇପି କାର୍ଯ୍ୟକ୍ରମ— ସବୁଠି ଆଗରେ ଦେଖିବାକୁ ମିଳେ ଟୋୟୋଟା ଇନୋଭା (Toyota Innova)। ଏହି MPV କେବଳ ଏକ କାର୍ ନୁହେଁ, ବରଂ କୋଟି କୋଟି ଭାରତୀୟଙ୍କ ପାଇଁ ଭରସା ଏବଂ ଆରାମର ଅନ୍ୟ ନାମ। କିନ୍ତୁ ଏବେ ଏହି ‘ରାସ୍ତାର ରାଜା’କୁ ନେଇ ଆସିଛି ଏକ ବଡ଼ ଦୁଃଖଦ ଖବର। ଆପଣଙ୍କ ପ୍ରିୟ ଦମଦାର୍ ଡିଜେଲ୍ MPV ଟୋୟୋଟା ଇନୋଭା କ୍ରିଷ୍ଟା (Innova Crysta) ଖୁବଶୀଘ୍ର ଇତିହାସ ପାଲଟିଯିବ।
ଟୋୟୋଟା କିର୍ଲୋସ୍କର ମୋଟର (TKM) ଏକ ବଡ଼ ନିଷ୍ପତ୍ତି ନେଇଛି। କମ୍ପାନୀ ଏହାର ସବୁଠାରୁ ଲୋକପ୍ରିୟ ମଡେଲ୍ ଇନୋଭା କ୍ରିଷ୍ଟାକୁ 2027 ମସିହାରେ ବନ୍ଦ କରିବାକୁ ଯାଉଛି। ଏହି ଖବର ଅଟୋମୋବାଇଲ୍ ମାର୍କେଟ୍ ପାଇଁ ଏକ ବଡ଼ ଝଟକା, କାରଣ ଏବେ ବି ଏହି ଗାଡ଼ିର ଡିମାଣ୍ଡ୍ ଜବରଦସ୍ତ ରହିଛି।
ତେବେ ହଠାତ୍ ଏମିତି ନିଷ୍ପତ୍ତି କାହିଁକି? ଏହାର ମୁଖ୍ୟ କାରଣ ହେଉଛି କମ୍ପାନୀର ‘ଗ୍ରୀନ୍ ଫ୍ୟୁଚର’ ପ୍ଲାନ୍। ଟୋୟୋଟା ନିଜର ଭବିଷ୍ୟତ ରଣନୀତି ଉପରେ କାମ କରୁଛି। କମ୍ପାନୀ ଟାର୍ଗେଟ୍ ରଖିଛି ଯେ 2030 ସୁଦ୍ଧା ଏହାର ମୋଟ୍ ଗାଡ଼ି ମଧ୍ୟରୁ 75% ଗାଡ଼ି ଇଲେକ୍ଟ୍ରିକ୍ କିମ୍ବା ହାଇବ୍ରିଡ୍ (ପେଟ୍ରୋଲ୍ ଓ ବ୍ୟାଟେରୀରେ ଚାଲୁଥିବା) ହେବ। ଏହି ପରିବେଶ ଅନୁକୂଳ ଯୋଜନାରେ ପୁରୁଣା ଡିଜେଲ୍ ଇଞ୍ଜିନ୍ ଚାଳିତ ଇନୋଭା କ୍ରିଷ୍ଟା ଆଉ ଫିଟ୍ ବସୁନାହିଁ। ପ୍ରଦୂଷଣ କମାଇବା ଏବଂ ନୂଆ ଟେକ୍ନୋଲୋଜି ଆପଣାଇବା ପାଇଁ କମ୍ପାନୀକୁ ଏହି କଠିନ ନିଷ୍ପତ୍ତି ନେବାକୁ ପଡିଛି।
ଆପଣଙ୍କୁ ମନେ ଥିବ, ଏହା ପୂର୍ବରୁ 2022 ଶେଷ ଆଡକୁ କମ୍ପାନୀ କିଛି ଦିନ ପାଇଁ କ୍ରିଷ୍ଟାର ବୁକିଂ ବନ୍ଦ କରିଦେଇଥିଲା। ସେତେବେଳେ ଲୋକେ ଭାବିଲେ ବୋଧହୁଏ ଗାଡ଼ିଟି ସବୁଦିନ ପାଇଁ ବନ୍ଦ ହୋଇଗଲା। କିନ୍ତୁ ଗ୍ରାହକଙ୍କ ଚାହିଦାକୁ ଦେଖି 2023 ଆରମ୍ଭରେ ଏହାକୁ ପୁଣିଥରେ ରି-ଲଞ୍ଚ କରାଯାଇଥିଲା, କିନ୍ତୁ କେବଳ ଡିଜେଲ୍ ମାନୁଆଲ୍ ଅପ୍ସନ୍ ସହିତ। ବର୍ତ୍ତମାନ ମାର୍କେଟରେ ପୁରୁଣା ଇନୋଭା କ୍ରିଷ୍ଟା ଏବଂ ନୂଆ ଆଧୁନିକ ହାଇବ୍ରିଡ୍ ‘ଇନୋଭା ହାଇକ୍ରସ୍’ (Innova Hycross) ଏକାଠି ବିକ୍ରି ହେଉଛି।
ଇନୋଭା କ୍ରିଷ୍ଟାର ବନ୍ଦ ହେବା ଖବର ବିଶେଷକରି ଟ୍ୟାକ୍ସି ସେଗମେଣ୍ଟ୍ ଏବଂ ବଡ଼ ପରିବାର ପାଇଁ ଚିନ୍ତାର ବିଷୟ। ଏହାର ଆରାମଦାୟକ ସିଟିଂ, ଦମଦାର୍ 2.4 ଲିଟର ଡିଜେଲ୍ ଇଞ୍ଜିନ୍ ଏବଂ କମ୍ ମେଣ୍ଟେନାନ୍ସ ଖର୍ଚ୍ଚ ପାଇଁ ଏହା ଲୋକଙ୍କ ପ୍ରଥମ ପସନ୍ଦ ଥିଲା। 2005 ରେ ପ୍ରଥମେ ଇନୋଭା ଭାରତରେ ଲଞ୍ଚ ହୋଇଥିଲା ଏବଂ ତା’ପରେ 2016 ରେ ‘କ୍ରିଷ୍ଟା’ ଅବତାରରେ ଆସିଥିଲା। ଏତେ ବର୍ଷ ଧରି କୌଣସି ଅନ୍ୟ ଗାଡ଼ି ଏହାର ସ୍ଥାନ ନେଇପାରି ନାହିଁ।
ଯଦିଓ କ୍ରିଷ୍ଟା 2027 ରେ ବିଦାୟ ନେବ, କିନ୍ତୁ ଟୋୟୋଟା ଇନୋଭା ବ୍ରାଣ୍ଡ୍ ଜାରି ରହିବ। କମ୍ପାନୀର ସମ୍ପୂର୍ଣ୍ଣ ଫୋକସ୍ ଏବେ ପେଟ୍ରୋଲ୍-ହାଇବ୍ରିଡ୍ ‘ଇନୋଭା ହାଇକ୍ରସ୍’ ଉପରେ ରହିଛି, ଯାହା ଭବିଷ୍ୟତରେ କ୍ରିଷ୍ଟାର ଉତ୍ତରାଧିକାରୀ ହେବ।
