ଭୁବନେଶ୍ୱର: ବିଶ୍ୱ ରାଜନୀତି ଏବେ ପୁଣି ଥରେ ସରଗରମ୍। ଗୋଟିଏ ପଟେ ଯୁଦ୍ଧର କଳା ବାଦଲ ଘୋଟି ଆସୁଥିବା ବେଳେ ଅନ୍ୟପଟେ ପାୱାରଫୁଲ୍ ଦେଶମାନଙ୍କର ମୁହାଁମୁହିଁ ପରିସ୍ଥିତି ସମସ୍ତଙ୍କ ଚିନ୍ତା ବଢାଇ ଦେଇଛି। ସମଗ୍ର ବିଶ୍ୱ ଏବେ ନିଶ୍ୱାସ ରୋକି ଅପେକ୍ଷା କରିଛି ଯେ ଆଗକୁ କ’ଣ ହେବ। ଠିକ୍ ଏହିଭଳି ଏକ ଉତ୍ତେଜନାପୂର୍ଣ୍ଣ ସମୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏମିତି ଏକ ବୟାନ ଦେଇଛନ୍ତି, ଯାହା ନିଆଁରେ ଘିଅ ଢାଳିବା ଭଳି କାମ କରିଛି।
ଟ୍ରମ୍ପ ସିଧାସଳଖ ଏବଂ କଡ଼ା ଶବ୍ଦରେ ଚେତାବନୀ ଦେଇଛନ୍ତି ଯେ, ଯଦି ଆମେରିକା କିମ୍ବା ଏହାର କୌଣସି ସମ୍ପତ୍ତି ଉପରେ ଆକ୍ରମଣ କରିବାକୁ ଚେଷ୍ଟା କରାଯାଏ, ତେବେ ଏହାର ପରିଣାମ ଖୁବ୍ ଭୟଙ୍କର ହେବ। ସେ ସ୍ପଷ୍ଟ ଭାବେ କହିଛନ୍ତି ଯେ ଆମେରିକା ‘ଦ୍ୱିତୀୟ ଷ୍ଟ୍ରାଇକ୍’ (Second Strike) ବା ପାଲଟା ଆକ୍ରମଣ ପାଇଁ ସମ୍ପୂର୍ଣ୍ଣ ପ୍ରସ୍ତୁତ ରହିଛି। ତାଙ୍କର ଏହି ଆକ୍ରମଣାତ୍ମକ ଆଭିମୁଖ୍ୟ ଦେଖି ଅନ୍ତର୍ଜାତୀୟ ମହଲରେ ହଲଚଲ ସୃଷ୍ଟି ହୋଇଛି।
ଆପଣମାନେ ଜାଣିଥିବେ, ନିକଟ ଅତୀତରେ କିଛି ଘଟଣାକୁ ନେଇ ଆମେରିକା ଏବଂ ଏହାର ବିରୋଧୀ ଦେଶମାନଙ୍କ ମଧ୍ୟରେ ତିକ୍ତତା ଚରମ ସୀମାରେ ପହଞ୍ଚିଛି। ପ୍ରଥମ ଆକ୍ସନ୍ ପରେ ବିପକ୍ଷ ପଟୁ ପ୍ରତିଶୋଧ ନେବାର ଧମକ ମିଳୁଥିଲା। ଏହି ପରିପ୍ରେକ୍ଷୀରେ ଟ୍ରମ୍ପଙ୍କ ଏହି ବୟାନ ଖୁବ୍ ଗୁରୁତ୍ୱପୂର୍ଣ୍ଣ। ସେ ଦୁନିଆକୁ ଜଣାଇ ଦେବାକୁ ଚାହାଁନ୍ତି ଯେ, ଆମେରିକା ଚୁପ୍ ବସିବ ନାହିଁ। ଯଦି ସାମାନ୍ୟ କିଛି ବି ରିଆକ୍ସନ୍ ଆସେ, ତେବେ ଆମେରିକା ପୂରା ସାମରିକ ଶକ୍ତି ଲଗାଇ ଏହାର କଡ଼ା ଜବାବ ଦେବ।
ରିପୋର୍ଟ ଅନୁସାରେ, ଟ୍ରମ୍ପ ଏମିତିକି କିଛି ନିର୍ଦ୍ଦିଷ୍ଟ ଏବଂ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଟାର୍ଗେଟ୍ ଚିହ୍ନଟ କରି ରଖିଥିବା କଥା ମଧ୍ୟ ଇଙ୍ଗିତ କରିଛନ୍ତି। ଏହି ଟାର୍ଗେଟ୍ ଲିଷ୍ଟରେ ବିପକ୍ଷ ଦେଶର କିଛି ବଡ଼ ସାମରିକ ଘାଟି ଏବଂ ସାଂସ୍କୃତିକ ସ୍ଥାନ ରହିଥିବା ଚର୍ଚ୍ଚା ହେଉଛି। ଯଦି ଦରକାର ପଡେ, ତେବେ ଆମେରିକା ସେନା ଏହି ସ୍ଥାନଗୁଡିକୁ ମାଟିରେ ମିଶାଇ ଦେବାକୁ ପଛାଇବ ନାହିଁ ବୋଲି ଏହି ଧମକରୁ ସ୍ପଷ୍ଟ ବାରି ହୋଇପଡୁଛି।
ଟ୍ରମ୍ପଙ୍କ ଏହି ଆଗ୍ରେସିଭ୍ ରୂପ ଦେଖି ଅନ୍ୟ ଶକ୍ତିଶାଳୀ ଦେଶମାନେ ମଧ୍ୟ ଚିନ୍ତାରେ ପଡିଯାଇଛନ୍ତି। କାରଣ ଯଦି ସତରେ ଦ୍ୱିତୀୟ ଥର ପାଇଁ ବଡ଼ ଧରଣର ମିସାଇଲ୍ କିମ୍ବା ଏୟାର୍ ଆଟାକ୍ ହୁଏ, ତେବେ ଏହା ଏକ ଭୟଙ୍କର ଯୁଦ୍ଧର ରୂପ ନେଇପାରେ। ଏହାର ସିଧାସଳଖ ପ୍ରଭାବ କେବଳ ଦୁଇଟି ଦେଶ ଭିତରେ ସୀମିତ ନରହି ସାରା ବିଶ୍ୱ ଅର୍ଥନୀତି, ବିଶେଷକରି ତୈଳ ବଜାର ଉପରେ ପଡିବାର ଯଥେଷ୍ଟ ଆଶଙ୍କା ରହିଛି। ବର୍ତ୍ତମାନ ସମସ୍ତଙ୍କ ନଜର ହ୍ୱାଇଟ୍ ହାଉସ୍ ଉପରେ ରହିଛି। ଟ୍ରମ୍ପଙ୍କ ଏହି ଧମକ କେବଳ କଥାରେ ସୀମିତ ରହିବ ନା ବାସ୍ତବରେ କିଛି ବଡ଼ ବିସ୍ଫୋରଣ ଘଟିବ, ତାହା ଆଗାମୀ ସମୟ ହିଁ କହିବ।
