ଭୁବନେଶ୍ୱର: ବିଶ୍ୱ ରାଜନୀତିରେ ପୁଣିଥରେ ତେଲକୁ ନେଇ ତାତି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବେ ଋଷ ତେଲ (Russian Oil) ଆମଦାନୀ କରୁଥିବା ଦେଶଗୁଡ଼ିକ ଉପରେ କଡ଼ା ନଜର ରଖିଛନ୍ତି। ଏପରିକି ସେ ଏହି ଦେଶଗୁଡ଼ିକ ଉପରେ ନୂଆ ଟାରିଫ୍ (Tariff) ଲଗାଇବା ନେଇ ସଙ୍କେତ ଦେଇଛନ୍ତି। ଏହି ପ୍ରସଙ୍ଗରେ ଟ୍ରମ୍ପ ସିଧାସଳଖ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନାଁ ନେଇ ଏକ ବଡ଼ ବୟାନ ଦେଇଛନ୍ତି, ଯାହାକୁ ନେଇ ଏବେ ଅନ୍ତର୍ଜାତୀୟ ମହଲରେ ଚର୍ଚ୍ଚା ଜୋର୍ ଧରିଛି।
ଏକ ସାକ୍ଷାତକାରରେ ଟ୍ରମ୍ପ କହିଛନ୍ତି ଯେ, ଭାରତ ଯେତେବେଳେ ଋଷଠାରୁ ବହୁଳ ମାତ୍ରାରେ ତେଲ କିଣୁଥିଲା, ସେତେବେଳେ ପ୍ରଧାନମନ୍ତ୍ରୀ ମୋଦୀ ଜାଣିଥିଲେ ଯେ ଆମେରିକା ଏଥିରେ ଖୁସି ନଥିଲା। ଟ୍ରମ୍ପଙ୍କ ଏହି ବୟାନ ଏଭଳି ସମୟରେ ଆସିଛି ଯେତେବେଳେ ସେ ପୁଣିଥରେ କ୍ଷମତାକୁ ଫେରିଛନ୍ତି ଏବଂ ଋଷ-ୟୁକ୍ରେନ୍ ଯୁଦ୍ଧକୁ ରୋକିବା ପାଇଁ ଋଷର ଆର୍ଥିକ ମେରୁଦଣ୍ଡ ଭାଙ୍ଗିବାକୁ ଚାହୁଁଛନ୍ତି।
ସୂଚନାଯୋଗ୍ୟ ଯେ, ଋଷ-ୟୁକ୍ରେନ୍ ଯୁଦ୍ଧ ଆରମ୍ଭ ହେବା ପରେ ଆମେରିକା ଓ ପାଶ୍ଚାତ୍ୟ ଦେଶଗୁଡ଼ିକ ଋଷ ଉପରେ ଅନେକ କଟକଣା ଲଗାଇଥିଲେ। କିନ୍ତୁ ଭାରତ ନିଜର ଶକ୍ତି ସୁରକ୍ଷା (Energy Security) ଏବଂ ଦେଶରେ ମୁଦ୍ରାସ୍ଫୀତିକୁ ନିୟନ୍ତ୍ରଣରେ ରଖିବା ପାଇଁ ଋଷଠାରୁ ଡିସକାଉଣ୍ଟ (Discount) ମୂଲ୍ୟରେ ଅଶୋଧିତ ତୈଳ କିଣିବା ଜାରି ରଖିଥିଲା। ଭାରତ ସରକାର ସର୍ବଦା ନିଜର ଏହି ନିଷ୍ପତ୍ତିକୁ ଦେଶର ସ୍ୱାର୍ଥରେ ବୋଲି କହି ଆସିଛନ୍ତି। ୟୁରୋପୀୟ ଦେଶଗୁଡ଼ିକ ତେଲ କିଣା ବନ୍ଦ କରିବା ପରେ ଭାରତ ଋଷର ଏକ ପ୍ରମୁଖ ତେଲ କ୍ରେତା ପାଲଟିଥିଲା।
ଏବେ ଟ୍ରମ୍ପଙ୍କ ଏହି ନୂଆ ଧମକ ଭାରତ ପାଇଁ ଚିନ୍ତାର କାରଣ ପାଲଟିପାରେ। ଯଦି ଆମେରିକା ସତରେ ଋଷ ତେଲ ଆମଦାନୀ ଉପରେ ଟାରିଫ୍ ଲଗାଏ, ତେବେ ଏହା ଭାରତର ଅର୍ଥନୀତି ଉପରେ ପ୍ରଭାବ ପକାଇପାରେ। ଟ୍ରମ୍ପ ସ୍ପଷ୍ଟ କରିଛନ୍ତି ଯେ ସେ ଋଷର ତେଲ ଓ ଗ୍ୟାସ୍ ରାଜସ୍ୱକୁ ବନ୍ଦ କରିବାକୁ ଚାହୁଁଛନ୍ତି ଯାହାଦ୍ୱାରା ଯୁଦ୍ଧ ବନ୍ଦ ହୋଇପାରିବ।
ଭାରତ ଏବଂ ଆମେରିକା ମଧ୍ୟରେ ବର୍ତ୍ତମାନ ଷ୍ଟ୍ରାଟେଜିକ୍ ପାର୍ଟନରସିପ୍ ବେଶ୍ ମଜଭୁତ ରହିଛି। ଟେକ୍ନୋଲୋଜି ଠାରୁ ଆରମ୍ଭ କରି ପ୍ରତିରକ୍ଷା କ୍ଷେତ୍ରରେ ଉଭୟ ଦେଶ ମିଳିମିଶି କାମ କରୁଛନ୍ତି। କିନ୍ତୁ ଋଷ ତେଲ ପ୍ରସଙ୍ଗ ଉଭୟ ଦେଶ ମଧ୍ୟରେ ଏକ ବିବାଦୀୟ ବିଷୟ ହୋଇ ରହିଆସିଛି। ଟ୍ରମ୍ପଙ୍କ ଏହି ସଦ୍ୟ ବୟାନ ପରେ ଭାରତ ସରକାର କିଭଳି ପ୍ରତିକ୍ରିୟା ରଖୁଛନ୍ତି ଏବଂ ଆଗାମୀ ଦିନରେ ନିଜର ତୈଳ ଆମଦାନୀ ନୀତିରେ କିଛି ପରିବର୍ତ୍ତନ କରୁଛନ୍ତି କି ନାହିଁ, ତାହା ଦେଖିବା ବାକି ରହିଲା।
