ନୂଆଦିଲ୍ଲୀ: କିଙ୍ଗ୍ କୋହଲିଙ୍କ କ୍ରେଜ୍ କମିବାର ନାଁ ନେଉନି। ସମସ୍ତେ ଭାବିଥିଲେ 2ଟି ମ୍ୟାଚ୍ ଖେଳି ସେ ଘରୋଇ କ୍ରିକେଟରୁ ବିଶ୍ରାମ ନେବେ। ହେଲେ ନା, ରନ୍ ମେସିନ୍ ଏବେ ବି ଭୋକିଲା! ନ୍ୟୁଜିଲ୍ୟାଣ୍ଡ ବିପକ୍ଷ ବଡ଼ ଲଢ଼େଇ ପୂର୍ବରୁ ବିରାଟ ଆଉ ଏକ ଇନିଂସ୍ ଖେଳିବାକୁ ନିଷ୍ପତ୍ତି ନେଇଛନ୍ତି। ଏହି ଖବର ଆସିବା ପରେ କ୍ରିକେଟ୍ ଫ୍ୟାନ୍ସଙ୍କ ମଧ୍ୟରେ ଉତ୍ସାହର ଲହରୀ ଖେଳିଯାଇଛି।
ଦିଲ୍ଲୀ ଆଣ୍ଡ ଡିଷ୍ଟ୍ରିକ୍ଟ କ୍ରିକେଟ୍ ଆସୋସିଏସନ୍ (DDCA) ସଭାପତି ରୋହନ ଜେଟଲୀ ଏହି ସୂଚନା ଦେଇଛନ୍ତି। ବିରାଟ ନିଜେ 3ୟ ମ୍ୟାଚ୍ ଖେଳିବାକୁ ଇଚ୍ଛା ପ୍ରକାଶ କରିଛନ୍ତି। ତେବେ ଆସନ୍ତୁ ଜାଣିବା ଏହି ହାଇ-ଭୋଲଟେଜ୍ ମ୍ୟାଚ୍ର ଡିଟେଲ୍ସ:
କେବେ ଓ କେଉଁଠି ହେବ ମ୍ୟାଚ୍?
ବିରାଟ କୋହଲି ଆସନ୍ତା ଜାନୁଆରୀ 6 ତାରିଖରେ ନିଜର ପରବର୍ତ୍ତୀ ମ୍ୟାଚ୍ ଖେଳିବେ। ଏହି ମ୍ୟାଚ୍ରେ ଦିଲ୍ଲୀର ମୁକାବିଲା ‘ରେଲୱେ’ (Railways) ଟିମ୍ ସହ ହେବ। ମ୍ୟାଚ୍ଟି ବେଙ୍ଗାଲୁରୁ ସ୍ଥିତ BCCI Centre of Excellence (COE) ଗ୍ରାଉଣ୍ଡରେ ଖେଳାଯିବ।
କାହିଁକି ଖେଳୁଛନ୍ତି ତୃତୀୟ ମ୍ୟାଚ୍?
BCCI ନିୟମ ଅନୁସାରେ କୋହଲିଙ୍କ ଭଳି ଷ୍ଟାର ଖେଳାଳିଙ୍କୁ ଅନ୍ତତଃ 2ଟି ଘରୋଇ ମ୍ୟାଚ୍ ଖେଳିବା ବାଧ୍ୟତାମୂଳକ ଥିଲା। କିନ୍ତୁ ବିରାଟ କେବଳ ନିୟମ ପାଇଁ ଖେଳୁନାହାନ୍ତି, ବରଂ ନିଜ ଫର୍ମକୁ ଆହୁରି ମଜବୁତ କରିବାକୁ ଚାହୁଁଛନ୍ତି। ଜାନୁଆରୀ 11ରୁ ନ୍ୟୁଜିଲ୍ୟାଣ୍ଡ ବିପକ୍ଷରେ ଦିନିକିଆ ସିରିଜ୍ ଆରମ୍ଭ ହେଉଛି। ତେଣୁ ଏହା ପୂର୍ବରୁ ଆଉ ଏକ ମ୍ୟାଚ୍ ଖେଳି ସେ ନିଜକୁ ସମ୍ପୂର୍ଣ୍ଣ ପ୍ରସ୍ତୁତ କରିବାକୁ ଲକ୍ଷ୍ୟ ରଖିଛନ୍ତି।
ଧମାକାଦାର ଫର୍ମରେ ବିରାଟ
ଚଳିତ ବିଜୟ ହଜାରେ ଟ୍ରଫିରେ ବିରାଟଙ୍କ ବ୍ୟାଟ୍ ଗର୍ଜୁଛି। ସେ ଏପର୍ଯ୍ୟନ୍ତ ଖେଳିଥିବା 2ଟି ମ୍ୟାଚ୍ରେ ଯଥାକ୍ରମେ 131 ଏବଂ 77 ରନ୍ ସଂଗ୍ରହ କରିଛନ୍ତି। କେବଳ ସେତିକି ନୁହେଁ, ଲିଷ୍ଟ୍-ଏ କ୍ରିକେଟ୍ରେ ଦ୍ରୁତତମ 16,000 ରନ୍ ପୂରଣ କରି ସେ ସଚିନ ତେନ୍ଦୁଲକରଙ୍କ ରେକର୍ଡ ମଧ୍ୟ ଭାଙ୍ଗିଛନ୍ତି। ଏବେ ରେଲୱେ ବୋଲରଙ୍କୁ ବିରାଟଙ୍କ କ୍ଲାସ୍ ଦେଖିବାକୁ ପଡ଼ିବ!
