ପୋଲସରା: ପୋଲସରା ବାଇପାସ୍ ରୋଡ୍ରେ ରକ୍ତର ଛିଟା। ଚାରିଆଡ଼େ ଆତଙ୍କର ମାହୋଲ। ଦିନ ଦ୍ଵିପ୍ରହରରେ ଜଣେ 25 ବର୍ଷର ଯୁବକଙ୍କୁ ଅତି ନିର୍ମମ ଭାବେ ହତ୍ୟା କରାଯାଇଛି। ଧାରୁଆ ଅସ୍ତ୍ରରେ ହାଣି ଦୁର୍ବୃତ୍ତମାନେ ଜଣେ ଯୁବକର ଜୀବନ ନେଇଯାଇଛନ୍ତି।
ମୃତ ଯୁବକଙ୍କ ନାଁ ଜିତେନ୍ଦ୍ର ବିଷୋୟୀ। ତାଙ୍କ ଘର ପୋଲସରା ଅଞ୍ଚଳରେ। ଖବର ମୁତାବକ, ଜିତେନ୍ଦ୍ର ଆଜି କୌଣସି କାମରେ ବାହାରକୁ ଯାଇଥିବା ବେଳେ ବାଇପାସ୍ ନିକଟରେ ତାଙ୍କୁ କିଛି ଦୁର୍ବୃତ୍ତ ଘେରି ଯାଇଥିଲେ। କିଛି ବୁଝିବା ଆଗରୁ ଆରମ୍ଭ ହୋଇଥିଲା ଆକ୍ରମଣ। ଧାରୁଆ ଅସ୍ତ୍ରରେ ତାଙ୍କୁ ଆଖିବୁଜା ହଣାଯାଇଥିଲା। ଲୋକେ ରୁଣ୍ଡ ହେବା ଆଗରୁ ଅଭିଯୁକ୍ତମାନେ ସ୍ପଟ୍ରୁ ଫେରାର୍ ହୋଇଯାଇଥିଲେ।
ଗୁରୁତର ଅବସ୍ଥାରେ ଜିତେନ୍ଦ୍ରଙ୍କୁ ଉଦ୍ଧାର କରାଯାଇ ହସ୍ପିଟାଲ ନିଆଯାଇଥିଲା, ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ତୀବ୍ର ଉତ୍ତେଜନା ପ୍ରକାଶ ପାଇଛି। ଜିତେନ୍ଦ୍ରଙ୍କ ପରିବାର ଲୋକେ ଏବେ ସମ୍ପୂର୍ଣ୍ଣ ଭାଙ୍ଗି ପଡ଼ିଛନ୍ତି।
ଖବର ପାଇ ପୁଲିସ୍ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ପୁଲିସ୍ ଶବକୁ ଜବତ କରି ପୋଷ୍ଟମର୍ଟମ ପାଇଁ ପଠାଇଛି। ପୂର୍ବ ଶତ୍ରୁତା ଯୋଗୁଁ ଏହି ହତ୍ୟାକାଣ୍ଡ ଘଟିଥିବା ପୁଲିସ୍ ପ୍ରାଥମିକ ତଦନ୍ତରୁ ସନ୍ଦେହ କରୁଛି। ଫେରାର୍ ହୋଇଯାଇଥିବା ହତ୍ୟାକାରୀମାନଙ୍କୁ ଧରିବା ପାଇଁ ପୁଲିସ୍ ଏକ ଟିମ୍ ଗଠନ କରି ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି। ଅଞ୍ଚଳରେ ଶାନ୍ତି ରକ୍ଷା ପାଇଁ ପୁଲିସ୍ ମୁତୟନ କରାଯାଇଛି।
