ତେହେରାନ: ଚାରିଆଡେ କେବଳ ଚିତ୍କାର, ଧୁାଁ ଆଉ ଅସନ୍ତୋଷର ନିଆଁ। ଗୋଟିଏ ପଟେ ପେଟର ଭୋକ, ଅନ୍ୟପଟେ ଶାସନର ଜୁଲମ। ରାସ୍ତା ଉପରେ ଏବେ ହଜାର ହଜାର ଲୋକ, ଆଉ ସମସ୍ତଙ୍କ ମୁହଁରେ ଗୋଟିଏ ଜିଦ୍। ଏମିତି ଏକ ଭୟଙ୍କର ଦୃଶ୍ୟ ଏବେ ଦେଖିବାକୁ ମିଳୁଛି ଇରାନର ରାଜରାସ୍ତାରେ, ଯେଉଁଠି ଜନତାଙ୍କ କ୍ରୋଧ ଏବେ ଶାସକଙ୍କ ଗାଦି ଦୋହଲାଇ ଦେଇଛି।
ଇରାନର ସ୍ଥିତି ଏବେ ଅତ୍ୟନ୍ତ ସଙ୍ଗୀନ। ଇକୋନୋମିକ୍ କ୍ରାଇସିସ୍ ବା ଆର୍ଥିକ ସଙ୍କଟ ଯୋଗୁଁ ସାଧାରଣ ଲୋକଙ୍କ ଜୀବନ ଦୁର୍ବିଷହ ହୋଇପଡିଛି। ଦରଦାମ ଆକାଶଛୁଆଁ ହୋଇଥିବା ବେଳେ, ଲୋକଙ୍କ ପାଖରେ ରୋଜଗାର ନାହିଁ। ଏଥିରେ ଅତିଷ୍ଠ ହୋଇ ସାଧାରଣ ଜନତା ଏବେ ରାସ୍ତାକୁ ଓହ୍ଲାଇ ଆସିଛନ୍ତି। ଆଉ ଏହି ପ୍ରୋଟେଷ୍ଟ ଏବେ କେବଳ ଦାବି ପୂରଣ ଭିତରେ ସୀମିତ ନାହିଁ, ବରଂ ଏହା ଏକ ବିରାଟ ବିଦ୍ରୋହର ରୂପ ନେଇଛି।
Fox News ର ଏକ ରିପୋର୍ଟ ଅନୁସାରେ, ନ୍ୟାସନାଲ କରେସପଣ୍ଡେଣ୍ଟ Jeff Paul ସୂଚନା ଦେଇଛନ୍ତି ଯେ ଇରାନର ବିଭିନ୍ନ ସହରରେ ବିକ୍ଷୋଭକାରୀମାନେ ଏକାଠି ହୋଇଛନ୍ତି। ସବୁଠାରୁ ବଡ କଥା ହେଲା, ଆନ୍ଦୋଳନକାରୀମାନେ ସିଧାସଳଖ ଦେଶର ଶାସକଙ୍କୁ ଟାର୍ଗେଟ କରୁଛନ୍ତି। ରାଜରାସ୍ତାରେ ଏବେ “ଡେଥ୍ ଟୁ ଦି ଡିକେଟର” (ଏକଛତ୍ରବାଦୀ ଶାସକଙ୍କ ମୃତ୍ୟୁ ହେଉ) ଭଳି କଡା ନାରା ଶୁଭୁଛି।
ଗଭର୍ଣ୍ଣମେଣ୍ଟ ପକ୍ଷରୁ ଏହି ଆନ୍ଦୋଳନକୁ ଦମନ କରିବା ପାଇଁ ପୋଲିସ୍ ଓ ସୁରକ୍ଷାକର୍ମୀଙ୍କୁ ମୁତୟନ କରାଯାଇଛି। କିନ୍ତୁ ଲୋକଙ୍କ ଭିଡ଼ ଏବଂ ଆକ୍ରୋଶ ଆଗରେ ପ୍ରଶାସନର ସବୁ ଚେଷ୍ଟା ଫିକା ପଡୁଥିବା ଭଳି ମନେହେଉଛି। 2026 ମସିହାର ଆରମ୍ଭରୁ ହିଁ ଇରାନରେ ଦେଖାଦେଇଥିବା ଏହି ଅସ୍ଥିରତା ଉପରେ ଏବେ ସାରା ବିଶ୍ୱର ନଜର ରହିଛି।
