ନୂଆଦିଲ୍ଲୀ: କ୍ରିକେଟ୍ ମଇଦାନରୁ ନୁହେଁ, ଏବେ ବିବାଦର ନିଆଁ ରାଜନୀତିରୁ ଆରମ୍ଭ ହୋଇଛି। ଗୋଟିଏ ପଟେ ବାଂଲାଦେଶରେ ହିନ୍ଦୁଙ୍କ ଉପରେ ଅତ୍ୟାଚାରର ଖବର, ଆଉ ଅନ୍ୟପଟେ କୋଲକାତା ନାଇଟ୍ ରାଇଡର୍ସ (KKR) ଜଣେ ବାଂଲାଦେଶୀ ଖେଳାଳିଙ୍କ ଉପରେ କୋଟି କୋଟି ଟଙ୍କା ଢାଳିବା। ଏହାକୁ ନେଇ ଦେଶସାରା ଅସନ୍ତୋଷର ନିଆଁ ଜଳୁଛି। ଏଭଳି ଏକ ଉତ୍ତେଜନାପୂର୍ଣ୍ଣ ପରିସ୍ଥିତିରେ ପୂର୍ବତନ ଇଣ୍ଡିଆନ୍ କ୍ରିକେଟର ମହମ୍ମଦ କୈଫ ଦେଇଛନ୍ତି ଏକ ବଡ଼ ବୟାନ।
ପୂରା ଘଟଣା କ’ଣ?
IPL 2026 ଅକ୍ସନରେ ଶାହରୁଖ ଖାନଙ୍କ ଟିମ୍ KKR ବାଂଲାଦେଶର ଷ୍ଟାର୍ ବୋଲର ମୁସ୍ତାଫିଜୁର ରହମାନଙ୍କୁ 9.20 କୋଟି ଟଙ୍କାରେ କିଣିଥିଲା। ହେଲେ ଏହା ପରେ ସୋସିଆଲ ମିଡିଆରୁ ନେଇ ରାଜରାସ୍ତା ପର୍ଯ୍ୟନ୍ତ ବିରୋଧ ଆରମ୍ଭ ହୋଇଗଲା। ବିଭିନ୍ନ ଧାର୍ମିକ ଓ ରାଜନୈତିକ ନେତା ପ୍ରଶ୍ନ ଉଠାଇଲେ ଯେ, ଯେତେବେଳେ ପଡୋଶୀ ଦେଶରେ ହିନ୍ଦୁମାନେ ସୁରକ୍ଷିତ ନାହାନ୍ତି, ସେତେବେଳେ ସେଠାକାର ଖେଳାଳିଙ୍କୁ କାହିଁକି ଏତେ ଟଙ୍କା ଦିଆଯାଉଛି? ମାମଲା ଏତେ ବଢିଗଲା ଯେ KKR ମାଲିକ ଶାହରୁଖଙ୍କୁ ମଧ୍ୟ କଡ଼ା ସମାଲୋଚନାର ଶିକାର ହେବାକୁ ପଡିଛି।
କୈଫଙ୍କ କ୍ଲିୟର କଟ୍ ମେସେଜ୍
ଏହି ବିବାଦ ଉପରେ ମୁହଁ ଖୋଲିଛନ୍ତି ମହମ୍ମଦ କୈଫ। ବର୍ତ୍ତମାନ ଦୁବାଇରେ ଥିବା କୈଫ କହିଛନ୍ତି, “ଭାଇ, ଏତେ ଜଲଦି ନିଷ୍ପତ୍ତି ନିଅନି। ‘ୱେଟିଂ ଗେମ୍’ ଖେଳ। BCCI ସବୁ ଦେଖୁଛି ଏବଂ ସେମାନେ ଜାଣନ୍ତି କ’ଣ କରିବାକୁ ହେବ।”
ସେ ଆହୁରି ମଧ୍ୟ କହିଛନ୍ତି ଯେ, ଏହା ଏକ ବହୁତ ସମ୍ବେଦନଶୀଳ (Sensitive) ଇସ୍ୟୁ। ଆମେ ବାହାରେ ବସି କିଛି ବି କହିପାରିବା, କିନ୍ତୁ ଅସଲ ନିଷ୍ପତ୍ତି BCCI ହାତରେ ଅଛି। “BCCI ଏତେ ବଡ଼ ଲିଗ୍ ଚଳାଉଛି, ସେମାନଙ୍କୁ ଜଣାଅଛି କେମିତି ସିଚୁଏସନ୍ ହ୍ୟାଣ୍ଡେଲ କରାଯାଏ। ତେଣୁ ଧୈର୍ଯ୍ୟ ଧରନ୍ତୁ, ଦେଖନ୍ତୁ ଆଗକୁ କ’ଣ ହେଉଛି,” ବୋଲି କୈଫ ପରାମର୍ଶ ଦେଇଛନ୍ତି।
ବିସିସିଆଇର ପରବର୍ତ୍ତୀ ପଦକ୍ଷେପ କ’ଣ ହେବ?
ଏବେ ସମସ୍ତଙ୍କ ନଜର ଭାରତୀୟ କ୍ରିକେଟ୍ ବୋର୍ଡ ଉପରେ। ଗୋଟିଏ ପଟେ ପବ୍ଲିକର ରାଗ ଆଉ ଅନ୍ୟପଟେ IPL ର ନିୟମ। କ’ଣ ମୁସ୍ତାଫିଜୁର ଭାରତ ଆସି ଖେଳିପାରିବେ ନା ତାଙ୍କୁ ‘ନୋ ଏଣ୍ଟ୍ରି’ ବୋର୍ଡ ଦେଖାଇ ଦିଆଯିବ? ତାହା ଆଗାମୀ ଦିନରେ ଜଣାପଡିବ। କିନ୍ତୁ କୈଫଙ୍କ କଥା ଯଦି ମାନିବା, ତେବେ ବର୍ତ୍ତମାନ କେବଳ ‘ୱେଟ୍ ଆଣ୍ଡ ୱାଚ୍’ ହିଁ ଏକମାତ୍ର ରାସ୍ତା।
