ନୂଆଦିଲ୍ଲୀ: ସୀମାରେ ଡ୍ରାଗନ୍ର ଚାଲାକି ଜାରି ରହିଛି। ଏଲଏସି (LAC)ରେ ସବୁବେଳେ ହାଇ ଆଲର୍ଟ ମୋଡ୍ରେ ରହିଛି ଭାରତୀୟ ସେନା। ଏଭଳି ଏକ ଗମ୍ଭୀର ମାହୋଲ ଭିତରେ ନିଜର ଆର୍ଟିଲାରୀ ପାୱାର୍ ବା ତୋପଖାନା ଶକ୍ତିକୁ ଆହୁରି ମଜଭୁତ କରିବାକୁ ଏକ ବଡ଼ ପଦକ୍ଷେପ ନେଇଛି ଭାରତ। ଖୁବଶୀଘ୍ର ସେନାର ହାତମୁଠାକୁ ଆସିବାକୁ ଯାଉଛି ବହୁ ଦୂର ପର୍ଯ୍ୟନ୍ତ ଟାର୍ଗେଟ୍ କରିପାରୁଥିବା ଘାତକ ରକେଟ୍ ଲଞ୍ଚର। ଆଉ ଏଥିପାଇଁ ବନ୍ଧୁ ଇସ୍ରାଏଲର ଦମଦାର ଟେକ୍ନୋଲୋଜି ଉପରେ ଭରସା କରିଛି ଭାରତ।
ରିପୋର୍ଟ ଅନୁସାରେ, ଭାରତୀୟ ସେନା ଏକ ବଡ଼ ପ୍ରତିରକ୍ଷା ଡିଲ୍ ଫାଇନାଲ୍ କରିବାକୁ ଯାଉଛି। ଏହି ଡିଲ୍ ଜରିଆରେ ସେନା ଲଙ୍ଗ୍ ରେଞ୍ଜ୍ ରକେଟ୍ ଲଞ୍ଚର୍ ସିଷ୍ଟମ୍ କିଣିବ। ସବୁଠାରୁ ବଡ଼ କଥା ହେଲା, ଏହି ଅତ୍ୟାଧୁନିକ ରକେଟ୍ ସିଷ୍ଟମ୍ ପଛରେ ରହିଛି ଇସ୍ରାଏଲର ଶକ୍ତିଶାଳୀ ଟେକ୍ନୋଲୋଜି। ଏହି ନୂଆ ସିଷ୍ଟମ୍ ଆସିବା ପରେ ସେନାର ଫାୟାର୍ ପାୱାର୍ ବହୁତ ବଢିଯିବ।
ସୂଚନା ମୁତାବକ, ଏହି ସିଷ୍ଟମ୍ ସମ୍ଭବତଃ ଇସ୍ରାଏଲର ଏଲବିଟ୍ ସିଷ୍ଟମ୍ସର ‘ପୁଲ୍ସ’ (PULS – Precise & Universal Launching System) ହୋଇପାରେ। ଏହାର ରେଞ୍ଜ୍ ବା ମାରକ କ୍ଷମତା ପାଖାପାଖି 300 କିଲୋମିଟର ରହିବ ବୋଲି କୁହାଯାଉଛି। ଅର୍ଥାତ୍ 300 କିମି ଦୂରରେ ଥିବା ଶତ୍ରୁର ଠିକଣାକୁ ଏହା ନିମିଷକରେ ଧ୍ୱଂସ କରିଦେବ।
ଏହା ଏକ ସରକାରରୁ ସରକାର (G2G) ଡିଲ୍ ହେବାର ସମ୍ଭାବନା ରହିଛି। ‘ମେକ୍ ଇନ୍ ଇଣ୍ଡିଆ’ ଅଭିଯାନ ଅଧୀନରେ ଏହି ଡିଲ୍ ହେବାକୁ ଯାଉଛି, ଯେଉଁଥିରେ ଟେକ୍ନୋଲୋଜି ଟ୍ରାନ୍ସଫର ମଧ୍ୟ ସାମିଲ ଅଛି। ଅର୍ଥାତ୍ ଭବିଷ୍ୟତରେ ଏହି ଘାତକ ରକେଟ୍ ଭାରତରେ ହିଁ ତିଆରି ହୋଇପାରିବ।
ପୂର୍ବ ଲଦାଖରେ ଚୀନ୍ ସହ ଦୀର୍ଘ ଦିନ ଧରି ଚାଲିଥିବା ସୀମା ବିବାଦକୁ ଦୃଷ୍ଟିରେ ରଖି ଏହି ଡିଲ୍ ବହୁତ ଗୁରୁତ୍ୱପୂର୍ଣ୍ଣ। ପାହାଡିଆ ଇଲାକାରେ ଦୂରରୁ ଶତ୍ରୁପକ୍ଷର ବଙ୍କର ଏବଂ ସେନା ଛାଉଣୀକୁ ଟାର୍ଗେଟ୍ କରିବା ପାଇଁ ସେନାକୁ ଏଭଳି ଲଙ୍ଗ୍ ରେଞ୍ଜ୍ ପ୍ରିସିସନ୍ (precision) ଷ୍ଟ୍ରାଇକ୍ କ୍ଷମତାର ଜରୁରୀ ଆବଶ୍ୟକତା ରହିଥିଲା।
ଭାରତୀୟ ସେନା ଏବେ ଦ୍ରୁତ ଗତିରେ ନିଜର ମଡର୍ଣ୍ଣାଇଜେସନ୍ ବା ଆଧୁନିକୀକରଣ କରୁଛି। ପୁରୁଣା ହତିଆର ବଦଳରେ ନୂଆ ଏବଂ ଘାତକ ଟେକ୍ନୋଲୋଜିକୁ ସାମିଲ କରାଯାଉଛି। ଇସ୍ରାଏଲ୍ ଟେକ୍ନୋଲୋଜି ଯୁକ୍ତ ଏହି ରକେଟ୍ ଲଞ୍ଚର ଆସିବା ପରେ ସୀମାରେ ଭାରତର ପଲା ଆହୁରି ଭାରୀ ହେବ, ଏଥିରେ ସନ୍ଦେହ ନାହିଁ।
