ଚଣ୍ଡିଗଡ଼: ରାଜନୀତିର ପାଗ କେତେବେଳେ କେଉଁଆଡ଼େ ମୋଡ଼ ନେବ, ତାହା କହିବା ମୁସ୍କିଲ। ଯେଉଁ ନେତା ଦିନେ ‘ଆପ୍’ର ପୋଷ୍ଟର ବୟ ଥିଲେ, ଆଜି କାଳେ ସେ ନିଜ ଦଳ ପାଇଁ ପର ହୋଇଯାଇଛନ୍ତି! ଆମ୍ ଆଦମୀ ପାର୍ଟିର ସବୁଠାରୁ ଚର୍ଚ୍ଚିତ ଚେହେରା ତଥା ରାଜ୍ୟସଭା MP ରାଘବ ଚଢ଼ାଙ୍କୁ ନେଇ ଏବେ ପୁରା ଦେଶରେ ଚର୍ଚ୍ଚା। ପଞ୍ଜାବର ଭଗବନ୍ତ ମାନ୍ ସରକାର ହଠାତ୍ ରାଘବଙ୍କ ପାଖରୁ ସବୁ ସୁରକ୍ଷା ବ୍ୟବସ୍ଥା ଫେରାଇ ନେଇଛନ୍ତି।
ସୂଚନା ଅନୁସାରେ, ରାଘବଙ୍କୁ ମିଳୁଥିବା ‘ସିକ୍ୟୁରିଟି’କୁ ସରକାର ସମ୍ପୂର୍ଣ୍ଣ ଭାବେ କାଟି ଦେଇଛନ୍ତି। ଏହି ଘଟଣା ପଛରେ ଏକ ବଡ଼ ‘ଡ୍ରାମା’ ଚାଲିଥିବା କୁହାଯାଉଛି। ସୋର୍ସ ଅନୁସାରେ, ‘ଆପ୍’ ହାଇକମାଣ୍ଡଙ୍କ ସହ ରାଘବଙ୍କର କିଛି ଦିନ ହେବ ଖଟାପଟା ଚାଲିଛି। ଦଳ ଭିତରେ ଥିବା ଏହି ‘କୋଲ୍ଡ ୱାର’ ଯୋଗୁଁ ହିଁ ପଞ୍ଜାବ ପୁଲିସ୍ ତାଙ୍କ ସିକ୍ୟୁରିଟି ୱିଡ୍ର (Withdraw) କରିଥିବା ଜଣାପଡ଼ିଛି।
ଗତ କିଛି ମାସ ଧରି ରାଘବ ଚଢ଼ାଙ୍କୁ ଦଳର କୌଣସି ବଡ଼ ଇଭେଣ୍ଟରେ ଦେଖିବାକୁ ମିଳୁନଥିଲା। ଏପରିକି ଅରବିନ୍ଦ କେଜ୍ରିୱାଲ ଜେଲ୍ ଯିବା ସମୟରେ ମଧ୍ୟ ସେ ଅଧିକାଂଶ ସମୟ ଲଣ୍ଡନରେ ଥିଲେ। ନିକଟରେ ସେ ରାଜ୍ୟସଭାକୁ ଫେରିଥିଲେ ମଧ୍ୟ ଦଳ ସହ ତାଙ୍କର ସମ୍ପର୍କ ପୂର୍ବ ଭଳି ନଥିବା ଚର୍ଚ୍ଚା ହେଉଛି।
ଏହି ଘଟଣା ଏବେ ପଞ୍ଜାବ ରାଜନୀତିରେ ହଇଚଇ ସୃଷ୍ଟି କରିଛି। ବିରୋଧୀ ଦଳଗୁଡ଼ିକ ଏହାକୁ ନେଇ ସରକାରଙ୍କୁ ଟାର୍ଗେଟ କରିବା ଆରମ୍ଭ କଲେଣି। ନିଜ ଦଳର MPଙ୍କ ସୁରକ୍ଷା କାହିଁକି ହଟାଗଲା, ସେ ନେଇ ଏବେ ସବୁଠି ପ୍ରଶ୍ନବାଚୀ ସୃଷ୍ଟି ହୋଇଛି।
