ନୂଆଦିଲ୍ଲୀ: ପଶ୍ଚିମ ଏସିଆ ଏବେ ଏକ ଜଳୁଥିବା ନିଆଁ ପିଣ୍ଡୁଳା। ଚାରିଆଡ଼େ ବାରୁଦର ଗନ୍ଧ ଆଉ ଆକାଶରେ ମିସାଇଲର ଗର୍ଜନ। ସାରା ଦୁନିଆ ଏବେ ଗୋଟିଏ ଭୟରେ ଥରୁଛି- କାଳେ 3rd World War ବା ତୃତୀୟ ବିଶ୍ୱଯୁଦ୍ଧ ଆରମ୍ଭ ହୋଇଯିବ କି? କିନ୍ତୁ ଏହି ଭୟଙ୍କର ସ୍ଥିତି ଭିତରେ ଏକ ନୂଆ ଖବର ସାମ୍ନାକୁ ଆସୁଛି। ଏକ୍ସପର୍ଟମାନଙ୍କ କହିବା କଥା, ଏହି ଲଢ଼େଇ ହୁଏତ ପୂରାପୂରି ସରିବନି କିମ୍ବା ମହାଯୁଦ୍ଧର ରୂପ ନେବନି, ବରଂ ଏହା ଏକ ‘ଫ୍ରୋଜେନ୍ କନଫ୍ଲିକ୍ଟ’ ବା ଅଧାପନ୍ତରିଆ ଯୁଦ୍ଧ ହୋଇ ରହିଯିବ।
ଏମିତି ସ୍ଥିତି କାହିଁକି ଉପୁଜିବ, ତା’ ପଛରେ ରହିଛି 3 ଟି ବଡ଼ କାରଣ:
୧. କେହି ଚାହୁଁନାହାନ୍ତି ‘ଫୁଲ୍ ସ୍କେଲ୍ ୱାର୍’: ସବୁଠୁ ବଡ଼ କାରଣ ହେଉଛି ‘ରିସ୍କ’। ଇରାନ ହେଉ କି ଇସ୍ରାଏଲ, କୌଣସି ବି ଦେଶ ଏବେ ପୂରାପୂରି ଯୁଦ୍ଧ କରିବା ମୁଡ୍ରେ ନାହାନ୍ତି। ଇରାନ ଜାଣିଛି ଯଦି ସେ ବଡ଼ ଧରଣର ଆଟାକ କରେ, ତେବେ ଇସ୍ରାଏଲ ସହ ଆମେରିକା ମଧ୍ୟ ମଇଦାନକୁ ଓହ୍ଲାଇବ। ସେପଟେ ଇସ୍ରାଏଲ ପାଇଁ ମଧ୍ୟ ଏହା ସହଜ ନୁହେଁ। ଯୁଦ୍ଧ ହେଲେ ଦେଶର ଇକୋନୋମି ପୂରାପୂରି ବିଗିଡ଼ିଯିବାର ଡର ରହିଛି। ତେଣୁ ଉଭୟ ପକ୍ଷ କେବଳ ନିଜର ଶକ୍ତି ପ୍ରଦର୍ଶନ କରି ଚୁପ୍ ରହିବାକୁ ସେଫ୍ ମଣୁଛନ୍ତି।
୨. ଶକ୍ତିଶାଳୀ ଡିଫେନ୍ସ ଓ ମିସାଇଲର ଖେଳ: ଦ୍ୱିତୀୟରେ, ଉଭୟ ଦେଶ ପାଖରେ ଭୟଙ୍କର ମାରକ ଶକ୍ତି ଅଛି। ଇସ୍ରାଏଲ ପାଖରେ ଦୁନିଆର ସବୁଠୁ ବେଷ୍ଟ ଡିଫେନ୍ସ ସିଷ୍ଟମ ଅଛି, ଯାହା ଶତ୍ରୁର ମିସାଇଲକୁ ଆକାଶରେ ହିଁ ମାରି ଖସାଇ ଦେଉଛି। ଅନ୍ୟପଟେ ଇରାନ ପାଖରେ ମିସାଇଲ ଏବଂ ଡ୍ରୋନ୍ର ବଡ଼ ଭଣ୍ଡାର ଅଛି। ଏମିତି ସ୍ଥିତିରେ କେହି କାହାକୁ ସହଜରେ ହରାଇ ପାରିବେନି। ଏହା ଏକ ‘ଡେଡଲକ୍’ ସ୍ଥିତି ସୃଷ୍ଟି କରିଛି, ଯେଉଁଠି ଲଢ଼େଇ ଚାଲିଥିବ କିନ୍ତୁ କେହି ଜିତିବେନି।
୩. ଗ୍ଲୋବାଲ ପଲିଟିକ୍ସ ଆଉ ଇଲେକ୍ସନ ପ୍ରେସର: ତୃତୀୟ କାରଣଟି ହେଉଛି ଆନ୍ତର୍ଜାତୀୟ ଚାପ। ଆମେରିକାରେ ଇଲେକ୍ସନ ସମୟ ପାଖେଇ ଆସୁଥିବାରୁ ବାଇଡେନ ସରକାର ଚାହୁଁନାହାନ୍ତି ଆଉ ଏକ ନୂଆ ଯୁଦ୍ଧରେ ଫସିବାକୁ। ଯଦି ଯୁଦ୍ଧ ବଢ଼େ, ତେବେ ତେଲ ଦର ଆକାଶଛୁଆଁ ହେବ, ଯାହାର ପ୍ରଭାବ ପୂରା ଦୁନିଆ ଉପରେ ପଡ଼ିବ। ରୁଷ ଏବଂ ଚୀନ୍ ମଧ୍ୟ ଏହି ଟେନସନକୁ କେବଳ ନିଜ ଫାଇଦା ପାଇଁ ବ୍ୟବହାର କରିବାକୁ ଚାହୁଁଛନ୍ତି, କିନ୍ତୁ ସେମାନେ ବି ସିଧାସଳଖ ଯୁଦ୍ଧ ଭିତରକୁ ପଶିବାକୁ ଡରୁଛନ୍ତି।
ଫଳରେ, ଏହି ଲଢ଼େଇ ଏବେ ଏମିତି ଏକ ମୋଡ଼ରେ ପହଞ୍ଚିଛି ଯେଉଁଠି ନିଆଁ ଜଳୁଥିବ, କିନ୍ତୁ ତାହା କାହାକୁ ପୂରାପୂରି ଜଳାଇ ପାରିବନି। ଲୋକେ ଏହାକୁ ଏକ ‘କୋଲ୍ଡ ୱାର୍’ ର ନୂଆ ରୂପ ବୋଲି କହୁଛନ୍ତି। ଯୁଦ୍ଧ ଥମିବନି, କିନ୍ତୁ ଏହା ଏମିତି ଛୋଟ ଛୋଟ ଆଟାକ ଭିତରେ ସୀମିତ ହୋଇ ରହିଯିବ।
