କୋଲକାତା: ନିର୍ବାଚନ କମିଶନ (ECI) ଏବେ ପୂରା ଆକ୍ସନ ମୁଡ୍ରେ। ପଶ୍ଚିମବଙ୍ଗ ସରକାରଙ୍କ ଉପରେ ବର୍ଷିଛନ୍ତି କମିଶନ। କେବଳ ସସ୍ପେଣ୍ଡ କଲେ ହେବନି, ଦୋଷୀ ଅଫିସରଙ୍କୁ ଜେଲ୍ ପଠାଅ। ଭୋଟର ଲିଷ୍ଟରେ ଜାଲିଆତି କରିଥିବା 5 ଜଣ ଅଫିସରଙ୍କ ବିରୋଧରେ ତୁରନ୍ତ FIR କରିବାକୁ ECI ନିର୍ଦ୍ଦେଶ ଦେଇଛି। ଏହି ଖବର ଏବେ ବଙ୍ଗଳା ରାଜନୀତିରେ କମ୍ପନ ସୃଷ୍ଟି କରିଛି।
ଘଟଣାଟି ବାରୁଇପୁର ପୂର୍ବ (Baruipur Purba) ଏବଂ ମୋୟନା (Moyna) ବିଧାନସଭା କ୍ଷେତ୍ରର। ଅଭିଯୋଗ ଅନୁସାରେ, ଏଠାରେ ନିୟୋଜିତ ଥିବା ନିର୍ବାଚନ ଅଧିକାରୀମାନେ ନିଜ କ୍ଷମତାର ଦୁରୁପଯୋଗ କରିଥିଲେ। ପ୍ରାୟ 100 ରୁ ଅଧିକ ‘ଭୂତ ଭୋଟର’ (Fictitious Voters) ବା ନକଲି ନାଁ ଲିଷ୍ଟରେ ଯୋଡ଼ା ଯାଇଥିଲା। ସବୁଠୁ ସାଙ୍ଘାତିକ କଥା ହେଲା, ଡାଟା ସିକ୍ୟୁରିଟି (Data Security) ନିୟମ ଭାଙ୍ଗି ଏମାନେ ନିଜର Login ID ଏବଂ Password ବାହାର ଲୋକଙ୍କ ସହ ସେୟାର କରିଥିଲେ।
ଯେଉଁ 5 ଜଣଙ୍କ ବିରୋଧରେ ଆକ୍ସନ ନିଆଯାଉଛି, ସେମାନଙ୍କ ମଧ୍ୟରେ 2 ଜଣ ERO (Electoral Registration Officers), 2 ଜଣ AERO ଏବଂ ଜଣେ ଡାଟା ଏଣ୍ଟ୍ରି ଅପରେଟର (Data Entry Operator) ଅଛନ୍ତି। ନିର୍ବାଚନ କମିଶନ ଅଗଷ୍ଟ 5, 2025 ରେ ଏମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଚିଠି ଲେଖିଥିଲେ। ରାଜ୍ୟ ସରକାର ଅଗଷ୍ଟ 20 ରେ ଏମାନଙ୍କୁ ସସ୍ପେଣ୍ଡ ତ କରିଦେଲେ, କିନ୍ତୁ FIR କଲେ ନାହିଁ। ଏଥିରେ ଅସନ୍ତୋଷ ପ୍ରକାଶ କରି ଜାନୁଆରୀ 2, 2026 ରେ ECI ପୁଣିଥରେ କଡ଼ା ଚେତାବନୀ ଦେଇଛନ୍ତି।
କମିଶନ ସ୍ପଷ୍ଟ କରିଛନ୍ତି ଯେ, ଏହା କେବଳ ଚାକିରିରୁ ନିଲମ୍ବନ ହେବା ଭଳି ଛୋଟ ଘଟଣା ନୁହେଁ। Representation of the People Act, 1950 ର ଧାରା 32 (Section 32) ଅନୁସାରେ ଏହା ଏକ ଅପରାଧ। ତେଣୁ ଜିଲ୍ଲା ନିର୍ବାଚନ ଅଧିକାରୀମାନେ ତୁରନ୍ତ ଏମାନଙ୍କ ନାଁରେ ପୋଲିସ୍ କେସ୍ କରିବାକୁ ବାଧ୍ୟ। ବର୍ତ୍ତମାନ ପଶ୍ଚିମବଙ୍ଗରେ ଭୋଟର ଲିଷ୍ଟ ସଂଶୋଧନ (SIR) ଚାଲିଥିବା ବେଳେ ଏହି କାର୍ଯ୍ୟାନୁଷ୍ଠାନ ଅନ୍ୟ ଅଫିସରଙ୍କ ପାଇଁ ଏକ ବଡ଼ ୱାର୍ଣ୍ଣିଂ।
