ମୁମ୍ବାଇ: ଷ୍ଟାଡିୟମରେ ହଜାର ହଜାର ଫ୍ୟାନ୍ସଙ୍କ ହୁଟିଂ ହେଉ କିମ୍ବା ସୋସିଆଲ ମିଡିଆରେ ଅସମ୍ଭାଳ ଟ୍ରୋଲିଂ— ହାର୍ଦ୍ଦିକ ପାଣ୍ଡ୍ୟାଙ୍କ ପିଛା ଛାଡ଼ୁନି ବିବାଦ। ମୁମ୍ବାଇ ଇଣ୍ଡିଆନ୍ସର କ୍ୟାପଟେନ ହେବା ପରଠୁ ସମାଲୋଚକମାନେ ଯେମିତି ତାଙ୍କୁ ଟାର୍ଗେଟ କରିବାକୁ ଜଗି ବସିଛନ୍ତି। କିନ୍ତୁ ଏବେ ଏହି ଲଢ଼େଇରେ ହାର୍ଦ୍ଦିକଙ୍କ ପାଇଁ ଢାଲ ସାଜିଛନ୍ତି ଜଣେ ପୁରୁଣା ସାଥୀ।
ମୁମ୍ବାଇ ଇଣ୍ଡିଆନ୍ସର ପୂର୍ବତନ କୋଚ୍ ମାର୍କ ବାଉଚର ଏବେ ହାର୍ଦ୍ଦିକଙ୍କ ସପକ୍ଷରେ ଜବରଦସ୍ତ ବ୍ୟାଟିଂ କରିଛନ୍ତି। ସମାଲୋଚକଙ୍କୁ ସିଧାସଳଖ ଆକ୍ରମଣ କରି ସେ କହିଛନ୍ତି ଯେ, କିଛି ଲୋକ କେବଳ ‘ଏକ୍ସକ୍ୟୁଜ’ (Excuse) ଖୋଜୁଛନ୍ତି। ପାଣ୍ଡ୍ୟାଙ୍କ ଉପରେ ଯେଉଁ ଅହେତୁକ ପ୍ରେସର ପକାଯାଉଛି, ତାହା ଆଦୌ ଠିକ୍ ନୁହେଁ ବୋଲି ସେ କଡ଼ା ଭାଷାରେ ଶୁଣାଇ ଦେଇଛନ୍ତି।
ବାଉଚରଙ୍କ ମତରେ, ରୋହିତ ଶର୍ମାଙ୍କ ବଦଳରେ ହାର୍ଦ୍ଦିକଙ୍କୁ କ୍ୟାପଟେନ କରିବା ଏକ ‘ପ୍ୟୁଅର କ୍ରିକେଟିଂ ଡିସିଜନ’ ଥିଲା। ଟିମର ଫ୍ୟୁଚର ପାଇଁ ଏହି ପ୍ଲାନ କରାଯାଇଥିଲା। କିନ୍ତୁ ଫ୍ୟାନ୍ସମାନେ ଏହାକୁ ଭିନ୍ନ ରୂପ ଦେଇଥିଲେ। ଗୋଟିଏ ପଟେ ପଡ଼ିଆ ଭିତରେ ପରଫରମାନ୍ସର ଚାପ ଓ ଅନ୍ୟପଟେ ବାହାରେ ଚାଲିଥିବା ବିବାଦ ଭିତରେ ହାର୍ଦ୍ଦିକ ଛନ୍ଦି ହୋଇଯାଇଥିଲେ। ତାଙ୍କୁ ନିଜ ଖେଳ ଉପରେ ଫୋକସ କରିବାକୁ ସୁଯୋଗ ଦିଆଗଲାନି।
ସେ ଆହୁରି ମଧ୍ୟ କହିଛନ୍ତି ଯେ, ହାର୍ଦ୍ଦିକ ଜଣେ କ୍ୱାଲିଟି ଅଲରାଉଣ୍ଡର। କିନ୍ତୁ ଗତ କିଛି ସିଜନରେ ତାଙ୍କୁ ଯେଉଁଭଳି ଖରାପ ପରିସ୍ଥିତିର ସାମ୍ନା କରିବାକୁ ପଡ଼ିଲା, ତାହା କୌଣସି ପ୍ଲେୟାର ପାଇଁ ସହଜ ନୁହେଁ। ସମାଲୋଚକମାନେ କେବଳ ବାହାରୁ ଦେଖି ଟିପ୍ପଣୀ ଦେଉଛନ୍ତି, କିନ୍ତୁ ଗ୍ରାଉଣ୍ଡର ବାସ୍ତବତା କଣ ତାହା ବୁଝିବାକୁ କେହି ଚେଷ୍ଟା କରୁନାହାନ୍ତି।
ତେବେ ପୂର୍ବତନ କୋଚ୍ଙ୍କ ଏହି ‘ବ୍ରୁଟାଲ ରିମାର୍କ’ ପରେ ପୁଣିଥରେ ଚର୍ଚ୍ଚା ଜୋର ଧରିଛି। IPL 2026 ପୂର୍ବରୁ ହାର୍ଦ୍ଦିକଙ୍କୁ ନେଇ ଚାଲିଥିବା ଏହି ଡିବେଟ୍ ଆଗକୁ କେଉଁ ମୋଡ଼ ନେଉଛି, ତାହା ଉପରେ ସମସ୍ତଙ୍କ ନଜର। ଷ୍ଟାର ପ୍ଲେୟାର ଜଣକ ନିଜ ପରଫରମାନ୍ସ ଜରିଆରେ ଏହି ସବୁ ସମାଲୋଚନାର ଜବାବ ଦେଇପାରୁଛନ୍ତି କି ନାହିଁ, ତାହା ହିଁ ବଡ଼ ପ୍ରଶ୍ନ।
