ମୁମ୍ବାଇ: ଶେୟାର ମାର୍କେଟରେ ଏବେ କେବଳ ଗୋଟିଏ ନାଁକୁ ନେଇ ଚର୍ଚ୍ଚା। ସେଇଟା ହେଉଛି ଆଇସିଆଇସିଆଇ ବ୍ୟାଙ୍କ। ବ୍ୟାଙ୍କର ଚତୁର୍ଥ କ୍ୱାର୍ଟର (Q4) ରେଜଲ୍ଟ ଆସିବା ପରେ ନିବେଶକଙ୍କ ମଧ୍ୟରେ ଖୁସିର ଲହର ଖେଳିଯାଇଛି। ସତେ ଯେମିତି ମାର୍କେଟରେ ଆଇସିଆଇସିଆଇ ବ୍ୟାଙ୍କର ରାଜ୍ ଚାଲିଛି। ରବିବାର ଛୁଟି ପରେ ସୋମବାର ବଜାର ଖୋଲୁ ଖୋଲୁ ଏହି ବ୍ୟାଙ୍କର ଶେୟାର ପ୍ରାଇସ୍ ରକେଟ୍ ଭଳି ଉପରକୁ ଛୁଟିଛି।
ବ୍ୟାଙ୍କ ପକ୍ଷରୁ ଦିଆଯାଇଥିବା ରିପୋର୍ଟ ଅନୁସାରେ, ଚଳିତ ଆର୍ଥିକ ବର୍ଷର ଶେଷ କ୍ୱାର୍ଟରରେ ବ୍ୟାଙ୍କର ନେଟ୍ ପ୍ରଫିଟ୍ 17.4% ବଢ଼ି 10,707.5 କୋଟି ଟଙ୍କାରେ ପହଞ୍ଚିଛି। ଗତ ବର୍ଷ ଏହି ସମୟରେ ଏହା 9,121.5 କୋଟି ଟଙ୍କା ଥିଲା। କେବଳ ପ୍ରଫିଟ୍ ନୁହେଁ, ବ୍ୟାଙ୍କର ନେଟ୍ ଇଣ୍ଟରେଷ୍ଟ ଇନକମ୍ (NII) ମଧ୍ୟ 8% ବୃଦ୍ଧି ପାଇ 19,093 କୋଟି ଟଙ୍କା ହୋଇଛି। ବ୍ୟାଙ୍କର ଏହି ଦମଦାର ପରଫରମାନ୍ସ ଦେଖି ମାର୍କେଟ ଏକ୍ସପର୍ଟମାନେ ମଧ୍ୟ ଆଶ୍ଚର୍ଯ୍ୟ ହୋଇଯାଇଛନ୍ତି।
ସୋମବାର ସକାଳୁ ଆଇସିଆଇସିଆଇ ବ୍ୟାଙ୍କର ଶେୟାର ପ୍ରାଇସ୍ ପ୍ରାୟ 4% ବଢ଼ି 1,150 ଟଙ୍କାରୁ ଅଧିକ ଲେଭଲରେ ଟ୍ରେଡ୍ କରୁଥିଲା। ଏହା ବ୍ୟାଙ୍କ ପାଇଁ ଏକ ନୂଆ ରେକର୍ଡ। ଗୋଟିଏ ପଟେ ମାର୍କେଟରେ ଅସ୍ଥିରତା ଲାଗି ରହିଥିବା ବେଳେ ଆଇସିଆଇସିଆଇ ବ୍ୟାଙ୍କ କିନ୍ତୁ ନିବେଶକଙ୍କୁ ମାଲେମାଲ୍ କରିଦେଇଛି। ବ୍ୟାଙ୍କର ଆସେଟ୍ କ୍ୱାଲିଟିରେ ମଧ୍ୟ ସୁଧାର ଆସିଛି, ଯାହା ଇନଭେଷ୍ଟରଙ୍କ ଭରସାକୁ ଦ୍ୱିଗୁଣିତ କରିଛି।
ବଡ଼ ବଡ଼ ବ୍ରୋକରେଜ୍ ହାଉସ୍ ଏବେ ଏହି ଷ୍ଟକକୁ ନେଇ ବହୁତ ପଜିଟିଭ୍ ଅଛନ୍ତି। ଜେଫ୍ରିଜ୍ (Jefferies), ମୋତିଲାଲ ଓସୱାଲ ଏବଂ ନୁଭାମା ଭଳି ସଂସ୍ଥାମାନେ ଏହି ଶେୟାରକୁ ‘Buy’ ରେଟିଂ ଦେଇଛନ୍ତି। କିଛି ଏକ୍ସପର୍ଟଙ୍କ ମତରେ ଆଗକୁ ଏହି ଶେୟାର ପ୍ରାଇସ୍ 1,300 ରୁ 1,450 ଟଙ୍କା ପର୍ଯ୍ୟନ୍ତ ଯାଇପାରେ। ତେଣୁ ଯଦି ଆପଣଙ୍କ ପାଖରେ ଏହି ଶେୟାର ଅଛି, ତେବେ ଏହାକୁ ‘Hold’ କରିବା କିମ୍ବା ନୂଆ କରି କିଣିବା ପାଇଁ ବଜାରରେ ଏବେ କ୍ରେଜ୍ ଦେଖିବାକୁ ମିଳୁଛି। ଷ୍ଟକ୍ ମାର୍କେଟର ଏହି ସୁନାମିରେ ଆଇସିଆଇସିଆଇ ବ୍ୟାଙ୍କ ଏବେ ସବୁଠୁ ଆଗରେ ରହିଛି।
