ନୂଆଦିଲ୍ଲୀ: ସାତ ଜଣ ସାଥୀ ଘରକୁ ଫେରି ଆସିଲେଣି। ପରିବାର ଲୋକଙ୍କ ଆଖିରେ ଏବେ ବି ଲୁହ ଶୁଖିନି। ସମସ୍ତେ ଭାବିଥିଲେ କମାଣ୍ଡର ପୂର୍ଣ୍ଣେନ୍ଦୁ ତିୱାରୀ ବି ଖୁବଶୀଘ୍ର ଇଣ୍ଡିଆ ଫେରିବେ। ହେଲେ କତାରରୁ ଯେଉଁ ଖବର ଆସୁଛି, ତାହା ପରିବାର ଲୋକଙ୍କ ଚିନ୍ତା ବଢ଼ାଇ ଦେଇଛି। ଗୋଟିଏ କେସରେ ଆଶ୍ବସ୍ତି ମିଳିଥିଲେ ବି ଅନ୍ୟ ଏକ କେସରେ ଫସିଛି ପେଞ୍ଚ। ଆଇନର ଏହି ଭୁଲଭୁଲୈୟା ଭିତରେ ପୂର୍ଣ୍ଣେନ୍ଦୁଙ୍କ ଘର ବାହୁଡ଼ା ଏବେ ବି ଅଧାବାଟରେ ଅଟକିଛି।
ଦୁଇଟି କେସ, ଦୁଇଟି ରାୟ ଭାରତ ସରକାର ଏହି ମାମଲାରେ ସ୍ପଷ୍ଟ କରିଛନ୍ତି ଯେ, କମାଣ୍ଡର ପୂର୍ଣ୍ଣେନ୍ଦୁଙ୍କ ନାଁରେ ଦୁଇଟି ଅଲଗା ଅଲଗା କେସ ଚାଲିଛି। ଫେବୃଆରୀ 2026 ରେ କତାରର ‘କୋର୍ଟ ଅଫ୍ କାସେସନ’ ତାଙ୍କୁ ଏକ ମାମଲାରେ ଦଣ୍ଡ ଶୁଣାଇଥିଲା। ଏହାପରେ ମାର୍ଚ୍ଚ 12 ତାରିଖରେ ଅନ୍ୟ ଏକ କେସରେ ତାଙ୍କୁ ରିଲିଫ୍ ମିଳିଥିଲା। ଲୋକଙ୍କୁ ଲାଗୁଥିଲା ଯେ ମାର୍ଚ୍ଚ ମାସର ରାୟ ପରେ ସେ ମୁକ୍ତ ହୋଇଯିବେ, କିନ୍ତୁ ଅସଲ କଥା ହେଉଛି ଫେବୃଆରୀ ମାସର ଦଣ୍ଡାଦେଶ ଯୋଗୁଁ ସେ ଏବେ ବି ଜେଲରେ ଅଛନ୍ତି। ବିଦେଶ ମନ୍ତ୍ରାଳୟ କହିଛି, ଏହି ଦୁଇଟି ଯାକ ମାମଲାକୁ ଏକାଠି ଦେଖିଲେ ଚଳିବନି।
ଫ୍ୟାମିଲି ସହ ଟଚ୍ରେ ସରକାର ବିଦେଶ ମନ୍ତ୍ରାଳୟର ସ୍ପୋକ୍ସପର୍ସନ ରଣଧୀର ଜୈସୱାଲ କହିଛନ୍ତି, “ଆମେ ପୂର୍ଣ୍ଣେନ୍ଦୁଙ୍କ ଫ୍ୟାମିଲି ସହ ସବୁବେଳେ କଥାବାର୍ତ୍ତା କରୁଛୁ। ତାଙ୍କୁ ସବୁ ପ୍ରକାର ସପୋର୍ଟ ଦିଆଯାଉଛି।” ଲିଗାଲ ହେଲ୍ପ (ଆଇନଗତ ସହାୟତା) ପାଇଁ ସରକାର ସବୁ ସୁବିଧା କରୁଛନ୍ତି। ବାକି 7 ଜଣ ଅଫିସର ଘରକୁ ଫେରି ସାରିଥିବା ବେଳେ କେବଳ ପୂର୍ଣ୍ଣେନ୍ଦୁଙ୍କୁ ନେଇ ଏବେ ସସପେନ୍ସ ଜାରି ରହିଛି। କତାର କୋର୍ଟର ପ୍ରୋସିଡିଂ ଯୋଗୁଁ ହିଁ ତାଙ୍କ ଆସିବାରେ ବିଳମ୍ବ ହେଉଛି।
ଫ୍ଲାସବ୍ୟାକ: କ’ଣ ଥିଲା ପୂରା ଘଟଣା? ଅଗଷ୍ଟ 2022 ରେ ଭାରତୀୟ ନୌସେନାର 8 ଜଣ ପୂର୍ବତନ ଅଫିସରଙ୍କୁ କତାରରେ ଅଟକ ରଖାଯାଇଥିଲା। ସେମାନଙ୍କ ଉପରେ ଏସପିଓନେଜ ବା ଗୁପ୍ତଚର ବୃତ୍ତିର ଆରୋପ ଲାଗିଥିଲା। ପ୍ରଥମେ ସେମାନଙ୍କୁ ମୃତ୍ୟୁଦଣ୍ଡ ଶୁଣାଯାଇଥିଲା, ଯାହା ପୂରା ଦେଶକୁ ସ୍ତବ୍ଧ କରିଦେଇଥିଲା। କିନ୍ତୁ ଭାରତ ସରକାରଙ୍କ ବାରମ୍ବାର ହସ୍ତକ୍ଷେପ ଏବଂ କୂଟନୈତିକ ଚାପ ଯୋଗୁଁ ସେହି ଦଣ୍ଡ କୋହଳ ହୋଇଥିଲା। ଶେଷରେ 7 ଜଣ ଅଫିସର ସୁରକ୍ଷିତ ଭାବେ ଇଣ୍ଡିଆ ଫେରି ଆସିଲେ। ଏବେ ପୂର୍ଣ୍ଣେନ୍ଦୁଙ୍କୁ କେମିତି ଫେରାଇ ଅଣାଯିବ, ତାହା ସରକାରଙ୍କ ପାଇଁ ବଡ଼ ଚ୍ୟାଲେଞ୍ଜ ପାଲଟିଛି।
ପୂର୍ଣ୍ଣେନ୍ଦୁଙ୍କ ମୁକ୍ତି ପାଇଁ ଦିଲ୍ଲୀରୁ ଦୋହା ଯାଏଁ ଚେଷ୍ଟା ଜାରି ରହିଛି, ହେଲେ ଏବେ ବି ସମସ୍ତଙ୍କ ନଜର କତାର କୋର୍ଟର ଆଗାମୀ ପଦକ୍ଷେପ ଉପରେ ରହିଛି।
