ପ୍ରୟାଗରାଜ: ପଲିଟିକ୍ସ କରିଡରରେ ଏବେ ଗୋଟିଏ ବଡ଼ ପ୍ରଶ୍ନକୁ ନେଇ ହଟଚମଟ। କଂଗ୍ରେସ ନେତା ରାହୁଲ ଗାନ୍ଧୀ ଜଣେ ଭାରତୀୟ ନା ସେ ବିଦେଶୀ? ଏହି ଚର୍ଚ୍ଚିତ ‘ଡୁଆଲ ସିଟିଜେନସିପ୍’ (Dual Citizenship) ମାମଲାକୁ ନେଇ ଆଜି ଆହ୍ଲାବାଦ ହାଇକୋର୍ଟରେ ବଡ଼ ଡ୍ରାମା ଦେଖିବାକୁ ମିଳିଛି। ସମସ୍ତେ ଆଶା କରିଥିଲେ ଆଜି କିଛି ଗୋଟେ ବଡ଼ ନିଷ୍ପତ୍ତି ଆସିବ, କିନ୍ତୁ ଶେଷ ମୁହୂର୍ତ୍ତରେ ମାମଲା ଏକ ନୂଆ ମୋଡ଼ ନେଇଛି।
କେସ୍ର ଶୁଣାଣି ଆରମ୍ଭ ହେବା ମାତ୍ରେ ବେଞ୍ଚର ଜଣେ ଜଜ୍ ନିଜକୁ ଏହି ପ୍ରକ୍ରିୟାରୁ ଦୂରେଇ ନେଇଛନ୍ତି। ଜଷ୍ଟିସ୍ ସଙ୍ଗୀତା ଚନ୍ଦ୍ରା ସ୍ପଷ୍ଟ କରିଛନ୍ତି ଯେ, ସେ ଏହି ମାମଲାର ଶୁଣାଣି କରିବେ ନାହିଁ। କୋର୍ଟ ଭାଷାରେ ଏହାକୁ ‘Not before me’ ବୋଲି କୁହାଯାଉଛି। ଏହା ପରେ ମାମଲାଟି ଏବେ ଅଟକି ଯାଇଛି।
ଘଟଣାଟି ହେଉଛି, କର୍ଣ୍ଣାଟକର ବିଗ୍ନେଶ ଶିଶିର ନାମକ ଜଣେ ବ୍ୟକ୍ତି ହାଇକୋର୍ଟରେ ଏକ ପିଟିସନ୍ (Petition) ଦାଖଲ କରିଥିଲେ। ତାଙ୍କର ଦାବି ଥିଲା ଯେ, ରାହୁଲ ଗାନ୍ଧୀ ଜଣେ ବ୍ରିଟିଶ୍ ନାଗରିକ ଏବଂ ଏହାର ସିବିଆଇ (CBI) ତଦନ୍ତ ହେବା ଦରକାର। ଏହା ପୂର୍ବରୁ ସେ କେନ୍ଦ୍ର ଗୃହ ମନ୍ତ୍ରାଳୟକୁ ମଧ୍ୟ ଏହି ବାବଦରେ ଅଭିଯୋଗ କରିଥିଲେ। କିନ୍ତୁ ଆଜି ଜଷ୍ଟିସ୍ ଚନ୍ଦ୍ରା ଓ ଜଷ୍ଟିସ୍ ବିଜୟ ରାଜ ସିଂହଙ୍କ ବେଞ୍ଚରେ ମାମଲା ପହଞ୍ଚିବା ପରେ ଶୁଣାଣି ଆଗକୁ ବଢ଼ିପାରି ନାହିଁ।
ଜଜ୍ କାହିଁକି ଏହି କେସ୍ରୁ ଓହରିଲେ, ସେ ନେଇ କୌଣସି ସ୍ପଷ୍ଟ କାରଣ ଜଣାପଡ଼ି ନାହିଁ। ତେବେ ଏହି ଘଟଣା ପରେ ଏବେ ବଲ୍ ମୁଖ୍ୟ ବିଚାରପତିଙ୍କ କୋର୍ଟରେ। ଚିଫ୍ ଜଷ୍ଟିସ୍ ଏବେ ଏହି ମାମଲା ପାଇଁ ଏକ ନୂଆ ବେଞ୍ଚ ଗଠନ କରିବେ। ଏହା ପରେ ହିଁ ସ୍ଥିର ହେବ ଯେ ରାହୁଲଙ୍କ ନାଗରିକତାକୁ ନେଇ ଉଠିଥିବା ଏହି ବିବାଦର ଭବିଷ୍ୟତ କ’ଣ ହେବ। ଏବେ ସମସ୍ତଙ୍କ ନଜର ପରବର୍ତ୍ତୀ ହିଅରିଂ (Hearing) ଉପରେ।
