ନୂଆଦିଲ୍ଲୀ: ଦିଲ୍ଲୀ ରାଜନୀତିର ହଟଚମଟ ଏବେ କୋର୍ଟ ରୁମ୍ରୁ ବାହାରି ଚିଠି ପର୍ଯ୍ୟନ୍ତ ପହଞ୍ଚିଲାଣି। ଲିକର ପଲିସି ମାମଲାରେ ଫସିଥିବା ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏବେ ଏକ ନୂଆ ପାନେ ଚଲେଇଛନ୍ତି। ଖାଲି ଓକିଲଙ୍କ ଭରସାରେ ନ ରହି ସେ ନିଜେ କଲମ ଧରିଛନ୍ତି। ଦିଲ୍ଲୀ ହାଇକୋର୍ଟର ଜଜ୍ ଜଷ୍ଟିସ ସ୍ୱର୍ଣ୍ଣକାନ୍ତ ଶର୍ମାଙ୍କୁ ଏକ ଲମ୍ବା ଚିଠି ଲେଖି କେଜ୍ରିୱାଲ ନିଜର ପକ୍ଷ ରଖିଛନ୍ତି। ଆଉ ଏହି ଲଢ଼େଇକୁ ସେ ‘ସତ୍ୟାଗ୍ରହ’ ବୋଲି ନାଁ ଦେଇଛନ୍ତି।
ସିନେମା ଷ୍ଟାଇଲରେ କେଜ୍ରିୱାଲ ତାଙ୍କ ଚିଠିରେ ଲେଖିଛନ୍ତି ଯେ, ଏହି ପୁରା ମାମଲା କୌଣସି ଆଇନଗତ ଲଢ଼େଇ ନୁହେଁ, ବରଂ ଏକ ‘ପଲିଟିକାଲ ଷଡ଼ଯନ୍ତ୍ର’। ସେଣ୍ଟ୍ରାଲ ଏଜେନ୍ସି ମାନଙ୍କୁ ବ୍ୟବହାର କରି ତାଙ୍କ ସ୍ୱର ଚାପିବାକୁ ଚେଷ୍ଟା କରାଯାଉଛି। କିନ୍ତୁ ସେ ହାର୍ ମାନିବା ଲୋକ ନୁହନ୍ତି। ଗଣତନ୍ତ୍ରକୁ ବଞ୍ଚାଇବା ପାଇଁ ସେ ଏହି କଷ୍ଟ ସହୁଛନ୍ତି ଏବଂ ଏହା ତାଙ୍କର ଏକ ପ୍ରକାର ଅହିଂସା ଆନ୍ଦୋଳନ ବୋଲି ସେ ଦର୍ଶାଇଛନ୍ତି।
କେଜ୍ରିୱାଲଙ୍କ କହିବା କଥା ହେଲା, ତାଙ୍କ ବିରୋଧରେ କୌଣସି ଠୋସ୍ ପ୍ରମାଣ ନାହିଁ। କେବଳ କିଛି ଲୋକଙ୍କ ବୟାନ ଆଧାରରେ ତାଙ୍କୁ ଜେଲରେ ରଖାଯାଇଛି। ଚିଠିରେ ସେ ବେଶ୍ ଭାବପ୍ରବଣ ହୋଇ ଲେଖିଛନ୍ତି ଯେ, ଜଣେ ମୁଖ୍ୟମନ୍ତ୍ରୀ ଭାବେ ନୁହେଁ, ବରଂ ଜଣେ ସାଧାରଣ ନାଗରିକ ଭାବେ ସେ ନିଜର ହକ୍ ପାଇଁ ଲଢ଼ୁଛନ୍ତି।
ଏହି ଚିଠି ଏବେ ସୋସିଆଲ ମିଡିଆରେ ବେଶ୍ ଭାଇରାଲ ହେବାରେ ଲାଗିଛି। ପୂର୍ବରୁ ହାଇକୋର୍ଟ କେଜ୍ରିୱାଲଙ୍କ ଗିରଫଦାରିକୁ ନେଇ କିଛି କଡ଼ା ଟିପ୍ପଣୀ ଦେଇଥିଲେ। ହେଲେ କେଜ୍ରିୱାଲ ଏହି ଚିଠି ମାଧ୍ୟମରେ ସିଧାସଳଖ ଜଜ୍ଙ୍କୁ ନିଜର ମନକଥା କହିବା ପରେ ଲିଗାଲ ସର୍କଲରେ ଚର୍ଚ୍ଚା ଜୋର ଧରିଛି। ଏବେ ଦେଖିବାକୁ ବାକି ରହିଲା, କେଜ୍ରିଙ୍କ ଏହି ‘ସତ୍ୟାଗ୍ରହ’ କାର୍ଡ କୋର୍ଟରେ କେତେ କାମ କରୁଛି।
