କରାଚୀ: ଖେଳ ପଡ଼ିଆରେ ଖେଳାଳିଙ୍କ ମଧ୍ୟରେ କଥା କଟାକଟି ହେବା କିଛି ନୂଆ କଥା ନୁହେଁ। କିନ୍ତୁ ଯେତେବେଳେ ଦୁଇଜଣ ଅଭିଜ୍ଞ ପ୍ଲେୟାର ପରସ୍ପରକୁ ମାରିବାକୁ ବ୍ୟାଟ୍ ଟେକନ୍ତି, ସେତେବେଳେ ଷ୍ଟାଡିୟମ୍ରେ ବସିଥିବା ଫ୍ୟାନ୍ସମାନେ ବି ତାଜୁବ୍ ହୋଇଯାଆନ୍ତି। ପାକିସ୍ତାନ ସୁପର ଲିଗ୍ (PSL) ମଇଦାନରେ ଠିକ୍ ଏମିତି ଏକ ଅପ୍ରୀତିକର ଦୃଶ୍ୟ ଦେଖିବାକୁ ମିଳିଛି। ବୋଲର ମହମ୍ମଦ ଆମିର ଏବଂ ବ୍ୟାଟ୍ସମ୍ୟାନ୍ ଇଫ୍ତିଖାର ଅହମ୍ମଦଙ୍କ ମଧ୍ୟରେ ହୋଇଥିବା ଝଗଡ଼ା ଏବେ ସୋସିଆଲ ମିଡିଆରେ ନିଆଁ ଭଳି ଭାଇରାଲ ହେଉଛି।
ଘଟଣାଟି ଘଟିଛି କ୍ୱେଟା ଗ୍ଲାଡିଏଟର୍ସ ଏବଂ ପେଶାୱାର ଜାଲମି ମଧ୍ୟରେ ଚାଲିଥିବା ଏକ ହାଇଭୋଲଟେଜ୍ ମ୍ୟାଚ୍ରେ। ମଇଦାନରେ ସବୁକିଛି ଠିକ୍ ଚାଲିଥିଲା, କିନ୍ତୁ ହଠାତ୍ ପରିବେଶ ଗରମ ହୋଇଯାଇଥିଲା। ମହମ୍ମଦ ଆମିର ବୋଲିଂ କରୁଥିବା ବେଳେ ଇଫ୍ତିଖାର ବ୍ୟାଟିଂ କରୁଥିଲେ। ଗୋଟିଏ ବଲ୍ ପରେ ଆମିର କିଛି ଅଶାଳୀନ କମେଣ୍ଟ ମାରିଥିଲେ। ବସ୍, ଏତିକିରେ ପାରା ଚଢ଼ିଯାଇଥିଲା ଇଫ୍ତିଖାରଙ୍କର। ସେ ରାଗରେ ନିଆଁ ହୋଇ ସିଧା ଆମିରଙ୍କ ଆଡ଼କୁ ବ୍ୟାଟ୍ ଟେକି ମାଡ଼ି ଆସିଥିଲେ।
ଦୁଇ ପ୍ଲେୟାରଙ୍କ ମଧ୍ୟରେ ଦୂରତା କମିବାରେ ଲାଗିଥିଲା ଏବଂ ଲାଗୁଥିଲା ଯେମିତି କ୍ରିକେଟ୍ ପଡ଼ିଆ ଏବେ କୁସ୍ତି ଆଖଡ଼ାରେ ପରିଣତ ହେବ। ଇଫ୍ତିଖାର ପୂରା ଆଗ୍ରେସିଭ୍ ମୁଡ୍ରେ ଥିଲେ। ପରିସ୍ଥିତି ବିଗୁଡ଼ୁଥିବା ଦେଖି ଅନ୍ୟ ପ୍ଲେୟାର ଏବଂ ଅମ୍ପାୟାର ତୁରନ୍ତ ଦୌଡ଼ି ଆସିଥିଲେ। ସେମାନେ ମଝିରେ ପଶି ଦୁହିଁଙ୍କୁ ଅଲଗା କରିବାକୁ ଚେଷ୍ଟା କରିଥିଲେ।
ଅମ୍ପାୟାରଙ୍କ ହସ୍ତକ୍ଷେପ ପରେ କଥା ଅଧିକ ବଢ଼ି ନଥିଲେ ବି ଦୁହିଁଙ୍କ ମୁହଁରେ ରାଗ ସ୍ପଷ୍ଟ ଜଣାପଡ଼ୁଥିଲା। ଏହି ଘଟଣାର ଭିଡିଓ ସାମ୍ନାକୁ ଆସିବା ପରେ କ୍ରିକେଟ୍ ପ୍ରେମୀମାନେ ନିଜର ପ୍ରତିକ୍ରିୟା ରଖୁଛନ୍ତି। କ୍ରିକେଟ୍ ଭଳି ଏକ ଜେଣ୍ଟଲମ୍ୟାନ୍ ଗେମ୍ରେ ଏମିତି ଆଚରଣ ଶୋଭା ପାଏ ନାହିଁ ବୋଲି ସବୁଆଡ଼େ ଚର୍ଚ୍ଚା ଚାଲିଛି। ପିଏସଏଲ୍ କମିଟି ଏହି ଘଟଣାକୁ ଗମ୍ଭୀରତାର ସହ ନେଇଥିବା ବେଳେ ଆଗକୁ ପ୍ଲେୟାରଙ୍କ ଉପରେ କିଛି କାର୍ଯ୍ୟାନୁଷ୍ଠାନ ହୋଇପାରେ ବୋଲି କୁହାଯାଉଛି।
