ୱାଶିଂଟନ: ଆମେରିକା ବଜାରରେ ଔଷଧ ଦରକୁ ନେଇ ଏବେ ତୁମ୍ବିତୋଫାନ। ଏପଟେ ବିରୋଧୀ ଘେରୁଛନ୍ତି, ଆଉ ସେପଟେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିଜ ଜିଦ୍ରେ ଅଟଳ। ଟ୍ରମ୍ପଙ୍କ କହିବା କଥା, ତାଙ୍କ ସମୟରେ ଔଷଧ ଦର ଯେତିକି କମିଛି, ତାହା ଗତ 46 ବର୍ଷ ଭିତରେ କେବେ ହୋଇନଥିଲା। ହେଲେ ଏହି ‘ଡାଟା’କୁ ନେଇ ଏବେ ପ୍ରଶ୍ନ ଉଠାଇଛନ୍ତି ଏକ୍ସପର୍ଟ।
ସବୁ ବିବାଦ ଭିତରେ ଟ୍ରମ୍ପ ଏବେ ନିଜର ନୂଆ ଗଣିତ ସାମ୍ନାକୁ ଆଣିଛନ୍ତି। ସେ କହିଛନ୍ତି ଯେ କାଲକୁଲେସନ କରିବାର ଦୁଇଟି ତରିକା ଅଛି। ଗୋଟିଏ ତରିକାରେ ଦେଖିଲେ ଦର କମିଛି, ଯାହାକୁ ସେ ନିଜର ସଫଳତା ବୋଲି କହୁଛନ୍ତି। ଟ୍ରମ୍ପଙ୍କ ଦାବି ଅନୁସାରେ, ‘କଞ୍ଜୁମର ପ୍ରାଇସ୍ ଇଣ୍ଡେକ୍ସ’ (CPI) କହୁଛି ଯେ ଔଷଧ ଦରରେ ବଡ଼ ଧରଣର ହ୍ରାସ ଘଟିଛି।
ବିରୋଧୀଙ୍କୁ ଟ୍ରମ୍ପଙ୍କ ଜବାବ ବିରୋଧୀ ଡେମୋକ୍ରାଟିକ ପାର୍ଟିର ନେତାମାନେ ଅଭିଯୋଗ କରୁଥିଲେ ଯେ ଔଷଧ କମ୍ପାନୀଗୁଡ଼ିକ ମନଇଚ୍ଛା ଦାମ ବଢ଼ାଉଛନ୍ତି। ଏହାର ଜବାବ ଦେଇ ଟ୍ରମ୍ପ କହିଛନ୍ତି, “ରିପୋର୍ଟ ଦେଖିବା ଶିଖନ୍ତୁ।” ତାଙ୍କ ମତରେ, ଯଦି ଆମେ ବ୍ଲୁ ବୁକ୍ ପ୍ରାଇସକୁ ନଦେଖି ପ୍ରକୃତ ଖର୍ଚ୍ଚକୁ ଦେଖିବା, ତେବେ ଜନତାଙ୍କ ପକେଟ୍ ଉପରେ ଚାପ କମିଛି।
କ’ଣ ଏହି 46 ବର୍ଷର ଗଣିତ? ଟ୍ରମ୍ପ ପ୍ରଶାସନ ପକ୍ଷରୁ କୁହାଯାଇଛି ଯେ 1973 ମସିହା ପରଠାରୁ ଔଷଧ ଦର ଏତେ ମାତ୍ରାରେ କେବେ ବି କମିନଥିଲା। ଏହା ତାଙ୍କ ସରକାରର ଏକ ବଡ଼ ‘ଆଚିଭମେଣ୍ଟ’। ଟ୍ରମ୍ପଙ୍କ କହିବା କଥା, ନ୍ୟୁଜ ଚ୍ୟାନେଲ ଏବଂ ବିରୋଧୀମାନେ ଭୁଲ ତଥ୍ୟ ଦେଇ ଲୋକଙ୍କୁ କନଫ୍ୟୁଜ୍ କରୁଛନ୍ତି।
ସୂଚନାଯୋଗ୍ୟ ଯେ, ଆମେରିକାରେ ହେଲ୍ଥକେୟାର ଏକ ବଡ଼ ଇସୁ। ଆଗକୁ ଇଲେକ୍ସନ ଥିବାରୁ ଟ୍ରମ୍ପ ଏବେ ଔଷଧ ଦରକୁ ମୁଖ୍ୟ ପ୍ରସଙ୍ଗ କରି ଭୋଟରଙ୍କୁ ଆକୃଷ୍ଟ କରିବାକୁ ଚେଷ୍ଟା କରୁଛନ୍ତି। ହେଲେ ଏହି କାଲକୁଲେସନ ଲଢ଼େଇ କେଉଁ ମୋଡ଼ ନେଉଛି, ତାହା ଉପରେ ଏବେ ସମସ୍ତଙ୍କ ନଜର।
