ମୁମ୍ବାଇ: ଷ୍ଟାଡିୟମ୍ ଭିତରେ କାନଫଟା ଚିତ୍କାର। ବଡ଼ ବଡ଼ ଦୁର୍ଦ୍ଦାନ୍ତ ବୋଲରମାନେ ରନ୍ ରୋକିବାକୁ ସଂଘର୍ଷ କରୁଛନ୍ତି, କିନ୍ତୁ କ୍ରିଜ୍ରେ ଠିଆ ହୋଇଥିବା ଜଣେ ୧୫ ବର୍ଷର କିଶୋର ପାଖରେ ଏହାର କୌଣସି ପ୍ରଭାବ ନାହିଁ। ବ୍ୟାଟ୍ ଧରିଲେ ବଲ୍ ସିଧା ଗ୍ୟାଲେରୀ ପାର୍। ଚାରିଆଡ଼େ ଏବେ ଖାଲି ଗୋଟିଏ ନାଁକୁ ନେଇ ଚର୍ଚ୍ଚା- ବୈଭବ ସୂର୍ଯ୍ୟବଂଶୀ। IPL ୨୦୨୬ ମୈଦାନରେ ଏହି ବିହାରୀ ପୁଅ ଯେଉଁଭଳି ବ୍ୟାଟିଂ କରୁଛନ୍ତି, ତାହା ଦେଖି ସିଲେକ୍ଟରମାନଙ୍କ ନିଦ ହଜିଗଲାଣି।
ରାଜସ୍ଥାନ ରୟାଲ୍ସ ଟିମ୍ ପକ୍ଷରୁ ଖେଳୁଥିବା ବୈଭବ ନିଜର ବିସ୍ଫୋରକ ଅନ୍ଦାଜରେ ସମସ୍ତଙ୍କୁ ଚକିତ କରିଦେଇଛନ୍ତି। ଗତ ମ୍ୟାଚ୍ରେ ତାଙ୍କର ଧୂଆଁଧାର ‘ଫିଫ୍ଟି’ (Fifty) ଏବେ କ୍ରିକେଟ୍ ଦୁନିଆରେ ହଇଚଇ ସୃଷ୍ଟି କରିଛି। ଏତେ କମ୍ ବୟସରେ ଏଭଳି ମ୍ୟାଚ୍ୟୁରିଟି ଆଉ ଶକ୍ତି ପ୍ରଦର୍ଶନ ଦେଖି ଏକ୍ସପର୍ଟମାନେ କହିଲେଣି, ଟିମ୍ ଇଣ୍ଡିଆରେ ଏଣ୍ଟ୍ରି ପାଇଁ ବୈଭବ ଏବେ ପୂରା ରେଡି। ସେ କେବଳ ଖେଳୁନାହାନ୍ତି, ବରଂ ବିସିସିଆଇ (BCCI) କୁ ଏକ ଶକ୍ତ ମେସେଜ୍ ଦେଉଛନ୍ତି।
ସୂଚନାଯୋଗ୍ୟ ଯେ, IPL ନିଲାମରେ ରାଜସ୍ଥାନ ରୟାଲ୍ସ ଏହି କୁନି ପିଲାଟିକୁ ୧.୧୦ କୋଟି ଟଙ୍କାରେ କିଣି ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲା। ଅନେକେ ଭାବୁଥିଲେ ୧୫ ବର୍ଷର ପିଲା କ’ଣ କରିବ? କିନ୍ତୁ ଏବେ ବୈଭବ ନିଜ ବ୍ୟାଟ୍ରେ ସମସ୍ତଙ୍କ ମୁହଁ ବନ୍ଦ କରିଦେଇଛନ୍ତି। ମୈଦାନର ପ୍ରତିଟି କୋଣକୁ ସେ ଯେଉଁଭଳି ବାଉଣ୍ଡ୍ରି ମାରୁଛନ୍ତି, ତାହା ଦେଖି ଲାଗୁଛି ସେ ଜଣେ ଅଭିଜ୍ଞ ଖେଳାଳି।
ବୈଭବଙ୍କ ଏହି ପରଫରମାନ୍ସ ପରେ ଏବେ ସୋଶାଲ ମିଡିଆରେ ଟ୍ରେଣ୍ଡ୍ ଚାଲିଛି ଯେ, ଖୁବ୍ ଜଲଦି ତାଙ୍କୁ ଇଣ୍ଡିଆ ଟିମ୍ର ବ୍ଲୁ-ଜର୍ସିରେ ଦେଖିବାକୁ ମିଳିବ। ବିହାରର ଏହି ଛୋଟ ପିଲାଟି ଏବେ କୋଟି କୋଟି କ୍ରିକେଟ୍ ଫ୍ୟାନ୍ଙ୍କ ପାଇଁ ନୂଆ ‘ସୁପରଷ୍ଟାର’ ପାଲଟିଯାଇଛି। ସିଲେକ୍ଟରମାନେ ମଧ୍ୟ ତାଙ୍କ ଉପରେ କଡ଼ା ନଜର ରଖିଛନ୍ତି। ଯଦି ଏହି ଫର୍ମ ଜାରି ରହେ, ତେବେ ଖୁବ୍ କମ୍ ଦିନ ଭିତରେ ବୈଭବ ଇଣ୍ଟରନ୍ୟାସନାଲ୍ କ୍ରିକେଟ୍ରେ ଡେବ୍ୟୁ କରି ଇତିହାସ ରଚିପାରନ୍ତି।
