କୋଲକାତା: ବେଙ୍ଗଲ୍ ରାଜନୀତିର ହାଇ-ଭୋଲଟେଜ୍ ଡ୍ରାମା ଆରମ୍ଭ। ସବୁଠି ଖାଲି ଚର୍ଚ୍ଚା ଆଉ ଟେନସନ୍। କଡ଼ା ସୁରକ୍ଷା ଆଉ ସେଣ୍ଟ୍ରାଲ ଫୋର୍ସଙ୍କ ତୀକ୍ଷ୍ଣ ନଜର ଭିତରେ ଆଜି ପଶ୍ଚିମବଙ୍ଗ ବିଧାନସଭା ନିର୍ବାଚନର ପ୍ରଥମ ପର୍ଯ୍ୟାୟ ଭୋଟ୍ ଶେଷ ହୋଇଛି। କେଉଁଠି ଗୁଳିମାଡ଼ ତ କେଉଁଠି ବୋମା ବିସ୍ଫୋରଣ, ହିଂସାର ଛାୟା ଭିତରେ ବି ଭୋଟର୍ଙ୍କ ଉତ୍ସାହ ଫିକା ପଡ଼ିନି।
ପ୍ରଥମ ପର୍ଯ୍ୟାୟରେ ଜଙ୍ଗଲ ମହଲର 5ଟି ଜିଲ୍ଲାର 30ଟି ସିଟ୍ ପାଇଁ ମଇଦାନକୁ ଓହ୍ଲାଇଛନ୍ତି 191 ଜଣ କ୍ୟାଣ୍ଡିଡେଟ୍। ସକାଳ 7ଟାରୁ ପୋଲିଂ ଷ୍ଟେସନ ବାହାରେ ଲୋକଙ୍କ ଲମ୍ବା ଲାଇନ୍ ଦେଖିବାକୁ ମିଳିଥିଲା। ବିଶେଷ କରି ପୁରୁଲିଆ, ବାଙ୍କୁଡ଼ା ଆଉ ଝାଡ଼ଗ୍ରାମ ଭଳି ଅଞ୍ଚଳରେ ଲୋକେ ନିଜର ମତାଧିକାର ସାବ୍ୟସ୍ତ କରିବାକୁ ବହୁ ସଂଖ୍ୟାରେ ବାହାରିଥିଲେ। ଖରାକୁ ଖାତିର ନକରି ବୟସ୍କଙ୍କ ଠାରୁ ଆରମ୍ଭ କରି ଯୁବପିଢ଼ି, ସମସ୍ତେ ବୁଥ୍ ଆଗରେ ଭିଡ଼ ଜମାଇଥିଲେ।
ତେବେ ଶାନ୍ତିପୂର୍ଣ୍ଣ ଭୋଟ୍ ବୋଲି ଯେତିକି ଆଶା କରାଯାଉଥିଲା, ସ୍ଥିତି ତା’ର ପୁରା ଓଲଟା ଦେଖିବାକୁ ମିଳିଛି। ପୂର୍ବ ମେଦିନିପୁରର ଏଗ୍ରା ଅଞ୍ଚଳରେ ଭୋଟ୍ ଆରମ୍ଭରୁ ହିଁ ଫାୟାରିଂ ହୋଇଥିବାର ଖବର ଆସିଛି। ସେହିପରି ସାଲବୋନିରେ ଜଣେ ପ୍ରାର୍ଥୀଙ୍କ ଗାଡ଼ିକୁ ଆଟାକ୍ କରାଯାଇଛି। TMC ଆଉ BJP କର୍ମୀଙ୍କ ମଧ୍ୟରେ ଅନେକ ସ୍ପଟ୍ରେ ଧସ୍ତାଧସ୍ତି ଦେଖିବାକୁ ମିଳିଛି। କେଉଁଠି ଇଭିଏମ୍ (EVM) ରେ ଗଡ଼ବଡ଼ି ତ ଆଉ କେଉଁଠି ଭୋଟର୍ଙ୍କୁ ଧମକ ଦେବା ନେଇ ପୁଲିସ୍ ପାଖରେ ଅଭିଯୋଗ ଫାଇଲ୍ ହୋଇଛି।
ଦିଦିଙ୍କ ଗଡ଼ରେ ଏଥର ମୋଦୀଙ୍କ ମ୍ୟାଜିକ୍ ଚାଲିବ ନା TMC ପୁଣି ବାଜି ମାରିବ, ତାକୁ ନେଇ ପଲିଟିକାଲ୍ କରିଡରରେ ଜୋରଦାର ଆଲୋଚନା ଚାଲିଛି। ସେଣ୍ଟ୍ରାଲ ଫୋର୍ସର ଲକ୍ଷେ ଜବାନ ମୁତୟନ ଥିଲେ ବି ପରିସ୍ଥିତି ଅନେକ ଜାଗାରେ ହାତରୁ ବାହାରି ଯାଇଥିଲା। ପ୍ରଥମ ପର୍ଯ୍ୟାୟରେ ଭୋଟ୍ ପର୍ସେଣ୍ଟେଜ୍ ବେଶ୍ ଭଲ ରହିଥିବାରୁ ଉଭୟ ଦଳ ଏବେ ନିଜ ନିଜର ଜିତିବା ନେଇ ଦାବି କରୁଛନ୍ତି। ତେବେ ସିଂହାସନ କାହାକୁ ମିଳିବ, ତାହା ରେଜଲ୍ଟ ଦିନ ହିଁ ସ୍ପଷ୍ଟ ହେବ।
