ମୁମ୍ବାଇ: ହାତରେ ଚିଲମ, ମୁଣ୍ଡରେ ଫୁଲ ଆଉ ସେହି ନିଶାଭରା କଣ୍ଠ… ‘ଦମ ମାରୋ ଦମ’ କହିଲେ ଆଜି ବି ଆଖି ଆଗକୁ ଚାଲିଆସେ ଜିନତ ଅମାନଙ୍କ ଚେହେରା। 70 ଦଶକର ଏହି ସୁପରହିଟ୍ ଗୀତକୁ ନେଇ ଏବେ ଏକ ବଡ଼ ଖୁଲାସା କରିଛନ୍ତି ବଲିଉଡର ଏହି ‘ଏଭରଗ୍ରୀନ’ ଅଭିନେତ୍ରୀ। ଆଶା ଭୋସଲେଙ୍କ କଣ୍ଠରେ ଶୁଭୁଥିବା ଏହି ଗୀତଟି ପ୍ରକୃତରେ ତାଙ୍କ ପାଇଁ ନଥିଲା। ଏହି ଗୀତକୁ ନେଇ ମ୍ୟୁଜିକ ଡାଇରେକ୍ଟର ଆର.ଡି. ବର୍ମନ ଓ ଦେବ ଆନନ୍ଦଙ୍କ ମଧ୍ୟରେ କଣ ହୋଇଥିଲା, ସେହି ରହସ୍ୟ ଉପରୁ ପରଦା ହଟାଇଛନ୍ତି ଜିନତ।
ଜିନତଙ୍କ କହିବା କଥା, ପ୍ରଥମେ ଏହି ଗୀତଟି ଏକ ‘ଡୁଏଟ’ (Duet) ଭାବେ ପ୍ଲାନ୍ କରାଯାଇଥିଲା। ଦେବ ଆନନ୍ଦ ଚାହୁଁଥିଲେ ଯେ, ସେହି ସମୟର ଦୁଇ ଜଣ ଦିଗ୍ଗଜ ଗାୟିକା ଲତା ମଙ୍ଗେଶକର ଓ ଉଷା ଉଥୁପ ଏକାଠି ମିଶି ଏହି ଗୀତ ଗାଆନ୍ତୁ। ଏଥିପାଇଁ ପୂରା ପ୍ରସ୍ତୁତି ମଧ୍ୟ ଚାଲିଥିଲା। ହେଲେ ମ୍ୟୁଜିକ ଡାଇରେକ୍ଟର ଆର.ଡି. ବର୍ମନ ବା ‘ପଞ୍ଚମ ଦା’ଙ୍କ ମନରେ କିଛି ଅଲଗା ହିଁ ଚାଲିଥିଲା। ସେ ଜାଣିଥିଲେ ଯେ, ଏହି ଗୀତ ପାଇଁ ଯେଉଁ ‘ଷ୍ଟାଇଲ’ ଦରକାର, ତାହା କେବଳ ଆଶା ଭୋସଲେ ହିଁ ଦେଇପାରିବେ।
ଜିନତ ନିଜ ସୋସିଆଲ ମିଡିଆ ଆକାଉଣ୍ଟରେ ଏହି କାହାଣୀ ଶେୟାର କରି ଲେଖିଛନ୍ତି ଯେ, ପଞ୍ଚମ ଦା କାହାକୁ କିଛି ନଜଣାଇ ଚୁପଚାପ ଆଶା ଭୋସଲେଙ୍କୁ ନେଇ ଗୀତର ରେକର୍ଡିଂ ଶେଷ କରିଦେଇଥିଲେ। ଯେତେବେଳେ ଦେବ ଆନନ୍ଦ ଏହି ‘ସୋଲୋ’ (Solo) ଭର୍ସନଟି ଶୁଣିଲେ, ସେ ପୂରା ଆଶ୍ଚର୍ଯ୍ୟ ହୋଇଯାଇଥିଲେ। ପ୍ରଥମେ ସେ ଟିକେ ବିରକ୍ତ ହୋଇଥିଲେ ମଧ୍ୟ, ଗୀତଟି ଶୁଣିବା ପରେ ସେ ଏତେ ଖୁସି ହୋଇଗଲେ ଯେ ଏହାକୁ ଫିଲ୍ମରେ ରଖିବାକୁ ରାଜି ହୋଇଥିଲେ।
ଏହି ଗୀତଟି 1971 ମସିହାର ଫିଲ୍ମ ‘ହରେ ରାମା ହରେ କ୍ରିଷ୍ଣା’ରେ ଥିଲା। ଆଉ ଏହା ରିଲିଜ ହେବା ପରେ କଣ ହୋଇଥିଲା, ତାହା ସମସ୍ତଙ୍କୁ ଜଣା। ‘ଦମ ମାରୋ ଦମ’ ରାତାରାତି ହିଟ୍ ହୋଇଥିଲା ଏବଂ ଆଶା ଭୋସଲେଙ୍କୁ ଶ୍ରେଷ୍ଠ ଗାୟିକା ଭାବେ ଫିଲ୍ମଫେୟାର ଆୱାର୍ଡ ମଧ୍ୟ ମିଳିଥିଲା। ପଞ୍ଚମ ଦାଙ୍କ ସେହି ଗୋଟିଏ ନିଷ୍ପତ୍ତି ବଲିଉଡକୁ ଏକ ‘ଆଇକନିକ’ ଗୀତ ଦେଇଥିଲା, ଯାହାର କ୍ରେଜ୍ ଆଜି ବି ପାର୍ଟି ଓ କ୍ଲବରେ କମିନାହିଁ।
