ମୁମ୍ବାଇ: ସୁଶାନ୍ତ ସିଂହ ରାଜପୁତଙ୍କ ମୃତ୍ୟୁ ପରଠାରୁ ରିଆ ଚକ୍ରବର୍ତ୍ତୀଙ୍କ ଜୀବନ ଯେମିତି ଅଟକି ଯାଇଥିଲା। ଗୋଟିଏ ପଟେ ପୁଲିସ୍ ଆଉ ଅନ୍ୟପଟେ ଏନସିବି (NCB)ର କଡ଼ା ପ୍ରଶ୍ନବାଣ। ଦୀର୍ଘ ଦିନର ଆଇନଗତ ଲଢ଼େଇ ପରେ ଏବେ ରିଆଙ୍କୁ ମିଳିଛି ବଡ଼ ଧରଣର ଆଶ୍ଵସ୍ତି। ଫ୍ରିଜ୍ ହୋଇ ରହିଥିବା ରିଆଙ୍କ ବ୍ୟାଙ୍କ ଆକାଉଣ୍ଟକୁ ଏବେ ଅନଫ୍ରିଜ୍ କରିବାକୁ କୋର୍ଟ ଗ୍ରୀନ୍ ସିଗନାଲ ଦେଇଛନ୍ତି।
ରିଆ ଚକ୍ରବର୍ତ୍ତୀ କୋର୍ଟରେ ଏକ ପିଟିସନ ଦାଖଲ କରି ଜଣାଇଥିଲେ ଯେ, ଦୀର୍ଘ 10 ମାସରୁ ଅଧିକ ସମୟ ଧରି ତାଙ୍କର ସବୁ ବ୍ୟାଙ୍କ ଆକାଉଣ୍ଟ ବନ୍ଦ ରହିଛି। ଯେଉଁଥିପାଇଁ ସେ ନିଜର ଟାକ୍ସ ଦେଇପାରୁନାହାନ୍ତି କି ନିଜର ଲାଇଫଷ୍ଟାଇଲ ମେଣ୍ଟେନ କରିପାରୁନାହାନ୍ତି। ତାଙ୍କ କର୍ମଚାରୀଙ୍କୁ ଦରମା ଦେବାରେ ମଧ୍ୟ ଅସୁବିଧା ହେଉଛି। ଏହି ଆବେଦନ ଉପରେ ଶୁଣାଣି କରି ସ୍ପେଶାଲ ଏନଡିପିଏସ (NDPS) କୋର୍ଟ ରିଆଙ୍କ ଆକାଉଣ୍ଟକୁ ପୁଣି ଚାଲୁ କରିବାକୁ ନିର୍ଦ୍ଦେଶ ଦେଇଛନ୍ତି।
ଖାଲି ବ୍ୟାଙ୍କ ଆକାଉଣ୍ଟ ନୁହେଁ, ତଦନ୍ତ ସମୟରେ ଜବତ ହୋଇଥିବା ତାଙ୍କର ଗ୍ୟାଜେଟ୍ ମଧ୍ୟ ଫେରି ପାଇବେ ରିଆ। ଏନସିବି ତାଙ୍କର ଏକ ଆପଲ୍ ଲାପଟପ୍ ଏବଂ ଆଇଫୋନ୍ ଜବତ କରିଥିଲା। ଏବେ ଏହି ସବୁ ସାମଗ୍ରୀ ରିଆଙ୍କୁ ଫେରସ୍ତ କରିବାକୁ କୋର୍ଟ କହିଛନ୍ତି। ତେବେ ଏଥିପାଇଁ ରିଆଙ୍କୁ 1 ଲକ୍ଷ ଟଙ୍କାର ଏକ ବଣ୍ଡ୍ ପେପର୍ ଦାଖଲ କରିବାକୁ ପଡ଼ିବ।
ସୂଚନାଯୋଗ୍ୟ ଯେ, ସୁଶାନ୍ତ ସିଂହ ରାଜପୁତ କେସ୍ରେ ଡ୍ରଗ୍ସ ଆଙ୍ଗେଲ୍ ସାମ୍ନାକୁ ଆସିବା ପରେ ରିଆଙ୍କୁ ଗିରଫ କରାଯାଇଥିଲା। ପରେ ସେ ଜେଲରୁ ବେଲ୍ରେ ଆସିଥିଲେ ମଧ୍ୟ ତାଙ୍କର ବ୍ୟାଙ୍କ ଆକାଉଣ୍ଟ ଓ ଗ୍ୟାଜେଟ୍ ଉପରେ କଟକଣା ଲଗାଯାଇଥିଲା। ଏହି ନୂଆ ଅର୍ଡର ପରେ ରିଆ ନିଜର ଆର୍ଥିକ କାରବାର ପୁଣି ସ୍ଵାଭାବିକ ଭାବେ କରିପାରିବେ।
