ମୁମ୍ବାଇ: ଚୁପ୍ ହୋଇଯାଇଛି ସେହି ମିଠା ସ୍ୱର। ସଂଗୀତ ଦୁନିଆର ସବୁଠୁ ଉଜ୍ଜ୍ୱଳ ନକ୍ଷତ୍ର ଆଶା ଭୋସଲେ ଆଉ ନାହାନ୍ତି। ସ୍ୱରର ସାମ୍ରାଜ୍ଞୀଙ୍କ ବିଦାୟ ପରେ ପୁରା ଦେଶ ଏବେ ଶୋକରେ ବୁଡ଼ି ରହିଥିବା ବେଳେ ସବୁଠୁ ବେଶୀ ଭାଙ୍ଗି ପଡ଼ିଛନ୍ତି ତାଙ୍କ ନାତୁଣୀ ଜାନାଇ ଭୋସଲେ। ଆଈଙ୍କ ମୃତ୍ୟୁ ପରେ ପ୍ରଥମ କରି ସୋସିଆଲ ମିଡିଆରେ ଏକ ଅତି ଦୁଃଖଭରା ପୋଷ୍ଟ ଶେୟାର କରିଛନ୍ତି ଜାନାଇ, ଯାହା ଏବେ ଇଣ୍ଟରନେଟରେ ଭାଇରାଲ ହେବାରେ ଲାଗିଛି।
ଜାନାଇ ନିଜ ଇନଷ୍ଟାଗ୍ରାମ ଆକାଉଣ୍ଟରେ ଆଶାଙ୍କୁ ‘ଲଭ୍ ଅଫ୍ ମାଇଁ ଲାଇଫ୍’ (Love of my life) ବୋଲି ସମ୍ବୋଧନ କରିଛନ୍ତି। ସେ ଲେଖିଛନ୍ତି ଯେ, “ସେ ଉପରୁ ସବୁ ଦେଖୁଛନ୍ତି” (She has seen it all from above)। ନିଜ ଆଈଙ୍କ ସହ ଥିବା ଅତି ନିବିଡ଼ ସମ୍ପର୍କକୁ ମନେ ପକାଇ ଜାନାଇ ଏହି ଇମୋସନାଲ ନୋଟ୍ ଲେଖିଛନ୍ତି। ଜାନାଇଙ୍କ ଏହି ପୋଷ୍ଟ ଦେଖି ଫ୍ୟାନ୍ସମାନଙ୍କ ଆଖି ମଧ୍ୟ ଓଦା ହୋଇଯାଇଛି।
ସୂଚନାଯୋଗ୍ୟ ଯେ, ଗତ ଏପ୍ରିଲ 12 ତାରିଖରେ ମୁମ୍ବାଇର ବ୍ରିଚ୍ କାଣ୍ଡି ହସ୍ପିଟାଲରେ 92 ବର୍ଷ ବୟସରେ ଆଶା ଭୋସଲେଙ୍କର ଦେହାନ୍ତ ହୋଇଥିଲା। ସେ ମଲ୍ଟି-ଅର୍ଗାନ ଫେଲୁଅର୍ କାରଣରୁ ଶେଷ ନିଶ୍ୱାସ ତ୍ୟାଗ କରିଥିଲେ। 8 ଦଶନ୍ଧିରୁ ଅଧିକ ସମୟ ଧରି ସେ ନିଜ ସ୍ୱରରେ କୋଟି କୋଟି ଲୋକଙ୍କୁ ମନ୍ତ୍ରମୁଗ୍ଧ କରି ରଖିଥିଲେ। କିନ୍ତୁ ଆଜି ସେହି ଲିଜେଣ୍ଡାରୀ ସିଙ୍ଗରଙ୍କ ଅନୁପସ୍ଥିତି ତାଙ୍କ ପରିବାର ଓ ବିଶେଷ କରି ଜାନାଇଙ୍କ ପାଇଁ ଏକ ଅପୂରଣୀୟ କ୍ଷତି।
ଜାନାଇ ସବୁବେଳେ ନିଜ ଆଈଙ୍କ ସହ ଅତି ନିକଟତର ରହିଆସିଛନ୍ତି। ବିଭିନ୍ନ ଇଭେଣ୍ଟ ଓ ପ୍ରୋଗ୍ରାମରେ ଦୁହିଁଙ୍କୁ ଏକାଠି ଦେଖିବାକୁ ମିଳୁଥିଲା। ଏବେ ଆଶାଙ୍କ ବିଦାୟ ପରେ ଜାନାଇ ନିଜକୁ ଏକା ଅନୁଭବ କରୁଥିଲେ ମଧ୍ୟ, ତାଙ୍କର ସ୍ମୃତିକୁ ନେଇ ଆଗକୁ ବଢ଼ିବାକୁ ଚେଷ୍ଟା କରୁଥିବା ଏହି ପୋଷ୍ଟରୁ ସ୍ପଷ୍ଟ ଜଣାପଡ଼ୁଛି।
