ବେଙ୍ଗାଲୁରୁ: କଥାରେ ଅଛି ‘ରକ୍ଷକ ଯଦି ଭକ୍ଷକ ସାଜେ’… ଠିକ୍ ସେମିତି କିଛି ଘଟିଛି ବେଙ୍ଗାଲୁରୁରେ। ଯେଉଁ ଟେକ୍ନୋଲୋଜିକୁ ଭରସା କରି ସରକାର ଦୁର୍ନୀତି ରୋକିବାକୁ ଚାହୁଁଥିଲେ, ସେହି ଟେକ୍ନୋଲୋଜିକୁ ହାତବାରିସି କରି ଲୁଟ୍ ହୋଇଛି କୋଟି କୋଟି ଟଙ୍କା। ଏହି ଘଟଣା ଏବେ କର୍ଣ୍ଣାଟକ ସରକାରଙ୍କ ମୁଣ୍ଡବିନ୍ଧାର କାରଣ ପାଲଟିଛି।
1322 ଫେକ୍ ରେଜିଷ୍ଟ୍ରେସନ୍, 5 ଅଫିସରଙ୍କୁ ଝଟକା ହାଇଟେକ୍ ସିଟିରେ ଏକ ବଡ଼ ଧରଣର ସ୍କାମ୍ (Scam) ସାମ୍ନାକୁ ଆସିଛି। ବେଙ୍ଗାଲୁରୁର 5 ଜଣ ସବ୍-ରେଜିଷ୍ଟ୍ରାର (Sub-registrars) ମିଳିମିଶି ପ୍ରାୟ 250 କୋଟି ଟଙ୍କାର ଘୋଟାଲା କରିଛନ୍ତି। ମୋଟ 1322ଟି ପ୍ରପର୍ଟିର ବେଆଇନ ରେଜିଷ୍ଟ୍ରେସନ୍ କରାଯାଇଛି। ଘଟଣା ଜଣାପଡିବା ପରେ ରାଜ୍ୟ ସରକାର ତୁରନ୍ତ ଆକ୍ସନ୍ ମୋଡ୍କୁ ଆସିଛନ୍ତି ଏବଂ ସମ୍ପୃକ୍ତ 5 ଅଫିସରଙ୍କୁ ଚାକିରିରୁ ସସପେଣ୍ଡ୍ କରିଦିଆଯାଇଛି।
ଇନଫୋସିସ୍ ଜମି ଉପରେ ବି ପଡିଲା ଆଖି ଏହି ଅଫିସରମାନେ ସରକାରୀ ସଫ୍ଟୱେର୍ ‘କାବେରୀ 2.0’ (Kaveri 2.0)ର ଦୁରୁପଯୋଗ କରିଥିଲେ। ନିୟମ ଅନୁସାରେ ଇ-ଖାତା (e-khata) ଏବଂ ମାଲିକାନା ଯାଞ୍ଚ ହେବା କଥା, ହେଲେ ଏସବୁକୁ ବାଇପାସ୍ କରି ଚୁପଚାପ୍ ରେଜିଷ୍ଟ୍ରେସନ୍ କରାଯାଇଥିଲା। ଏମାନଙ୍କ ସାହସ ଏତେ ବଢିଯାଇଥିଲା ଯେ, ଇନଫୋସିସ୍ (Infosys) ଭଳି ବଡ଼ କମ୍ପାନୀ ସହ ଜଡିତ 53.5 ଏକର ଜମିକୁ ମଧ୍ୟ ଏମାନେ ବେଆଇନ ଭାବେ ରେଜିଷ୍ଟ୍ରି କରିଦେଇଛନ୍ତି।
ଆକ୍ଟିଭ୍ ହେଲା ସାଇବର କ୍ରାଇମ୍ ଟିମ୍ ଏହି ଘଟଣା ପଛରେ ଏକ ବଡ଼ ର୍ୟାକେଟ୍ କାମ କରୁଥିବା ସନ୍ଦେହ କରାଯାଉଛି। ରେଭିନ୍ୟୁ ଡିପାର୍ଟମେଣ୍ଟ୍ର ନିର୍ଦ୍ଦେଶ ପରେ ପୁଲିସ୍ ଏବଂ ସାଇବର କ୍ରାଇମ୍ (Cybercrime) ଟିମ୍ ତଦନ୍ତ ଆରମ୍ଭ କରିଦେଇଛନ୍ତି। କାବେରୀ 2.0 ସିଷ୍ଟମ୍ ହ୍ୟାକ୍ ହୋଇଛି ନା ଅଫିସରମାନେ ଜାଣିଶୁଣି ଏଭଳି କରିଛନ୍ତି, ତାହାର ଖୋଳତାଡ଼ ଚାଲିଛି। ବର୍ତ୍ତମାନ ସେହି 1322ଟି ସନ୍ଦିଗ୍ଧ ରେଜିଷ୍ଟ୍ରେସନ୍କୁ ଯାଞ୍ଚ କରାଯାଉଛି, ଯାହା ଫଳରେ ପ୍ରକୃତ ଜମି ମାଲିକମାନେ ଚିନ୍ତାରେ ପଡିଯାଇଛନ୍ତି।
