ସାରଣ୍ଡା: ଶାନ୍ତ ପଡ଼ିଥିଲା ସାରଣ୍ଡା ଜଙ୍ଗଲ। ଚାରିଆଡ଼େ ଥିଲା ନିଶୂନ ପରିବେଶ। ହଠାତ୍ ଏକ ଜୋରଦାର ଶବ୍ଦରେ ଥରିଗଲା ପୂରା ଅଞ୍ଚଳ। ଧୂଆଁମୟ ହୋଇଗଲା ପରିବେଶ। ପୁଲିସ୍କୁ ଟାର୍ଗେଟ୍ କରି ମାଓବାଦୀମାନେ ବିଛାଇଥିବା ମରଣଯନ୍ତା ଏବେ ଜଣେ ନିରିହ ଗ୍ରାମବାସୀଙ୍କ ଜୀବନ ଦୁର୍ବିସହ କରିଦେଇଛି। ଓଡ଼ିଶା-ଝାଡ଼ଖଣ୍ଡ ସୀମାନ୍ତ ସାରଣ୍ଡା ଜଙ୍ଗଲରେ ମାଓବାଦୀଙ୍କ ଖଞ୍ଜା ଆଇଇଡି (IED) ବିସ୍ଫୋରଣ ହୋଇ ଜଣେ ଗ୍ରାମବାସୀ ଗୁରୁତର ହୋଇଛନ୍ତି।
ସୂଚନା ଅନୁସାରେ, ସାରଣ୍ଡା ଜଙ୍ଗଲ ଭିତର ଦେଇ ଗ୍ରାମବାସୀ ଜଣକ କୌଣସି କାମରେ ଯାଉଥିବା ବେଳେ ମାଓବାଦୀଙ୍କ ପ୍ରେସର ଆଇଇଡି ଉପରେ ତାଙ୍କ ଗୋଡ଼ ପଡ଼ିଯାଇଥିଲା। ପଲକ ପକାଇବା ଆଗରୁ ଏକ ଶକ୍ତିଶାଳୀ ବିସ୍ଫୋରଣ ଘଟିଥିଲା। ଏହି ବ୍ଲାଷ୍ଟ ଏତେ ଭୟଙ୍କର ଥିଲା ଯେ ଘଟଣା ସ୍ଥଳରେ ହିଁ ଗ୍ରାମବାସୀଙ୍କ ଗୋଡ଼ ଛିନ୍ଭିନ୍ ହୋଇଯାଇଛି। ସ୍ଥାନୀୟ ଲୋକଙ୍କ ସହାୟତାରେ ତାଙ୍କୁ ତୁରନ୍ତ ଉଦ୍ଧାର କରାଯାଇ ପାଖ ହସ୍ପିଟାଲରେ ଆଡମିଟ୍ କରାଯାଇଛି। ବର୍ତ୍ତମାନ ତାଙ୍କ ଅବସ୍ଥା ସଙ୍କଟାପନ୍ନ ଥିବା ଜଣାପଡ଼ିଛି।
ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ଖେଳିଯାଇଛି। ପୁଲିସ୍ ଏବଂ ସୁରକ୍ଷା ବାହିନୀ ପକ୍ଷରୁ ସାରଣ୍ଡା ଜଙ୍ଗଲରେ ସର୍ଚ୍ଚ ଅପରେସନକୁ ଜୋରଦାର କରାଯାଇଛି। ସୁରକ୍ଷାକର୍ମୀଙ୍କ ଗତିବିଧିକୁ ରୋକିବା ପାଇଁ ମାଓବାଦୀମାନେ ଜଙ୍ଗଲର ବିଭିନ୍ନ ସ୍ଥାନରେ ଏଭଳି ବୋମା ଖଞ୍ଜିଥିବା ସନ୍ଦେହ କରାଯାଉଛି। ଘଟଣା ପରେ ସୀମାନ୍ତ ଅଞ୍ଚଳରେ ହାଇ ଆଲର୍ଟ ଜାରି କରାଯାଇଛି। ଜଙ୍ଗଲ ଭିତରକୁ ନଯିବା ପାଇଁ ଆଖପାଖ ଗାଁ ଲୋକଙ୍କୁ ସତର୍କ କରାଯାଇଛି। ଅନ୍ୟପଟେ, ଏହି କାଣ୍ଡ ଘଟାଇବା ପରେ ମାଓବାଦୀମାନେ ଘଞ୍ଚ ଜଙ୍ଗଲ ଭିତରକୁ ଫେରାର ହୋଇଯାଇଥିବା ଅନୁମାନ କରାଯାଉଛି।
