ନୂଆଦିଲ୍ଲୀ: ଦେଶର କୋଣ ଅନୁକୋଣରେ ଏବେ ଗୋଟିଏ ସ୍ୱର- ‘ଆମ ଝିଅମାନେ ସୁରକ୍ଷିତ ତ?’ କୋଲକାତାରୁ ବଦଲାପୁର, ମହିଳାଙ୍କ ପ୍ରତି ହେଉଥିବା ଅପରାଧକୁ ନେଇ ସାରା ଦେଶରେ ଏବେ କ୍ରୋଧର ନିଆଁ ଜଳୁଛି। ଏହି ସମ୍ବେଦନଶୀଳ ପ୍ରସଙ୍ଗରେ ଏବେ ନିଜେ ମଇଦାନକୁ ଓହ୍ଲାଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ମହିଳାଙ୍କ ସୁରକ୍ଷାକୁ ନେଇ ସେ ଦେଇଛନ୍ତି ଏକ କଡ଼ା ବାର୍ତ୍ତା, ଯାହା ଅପରାଧୀଙ୍କ ନିଦ ହଜାଇ ଦେବା ପାଇଁ ଯଥେଷ୍ଟ।
ପ୍ରଧାନମନ୍ତ୍ରୀ ସ୍ପଷ୍ଟ କରିଛନ୍ତି ଯେ, ମହିଳାଙ୍କ ବିରୋଧରେ ହେଉଥିବା ଅପରାଧ ଏକ ‘ଅକ୍ଷମଣୀୟ ପାପ’। ଯେଉଁମାନେ ଏଥିରେ ସାମିଲ ଅଛନ୍ତି, ସେମାନଙ୍କୁ କୌଣସି ବି ସ୍ଥିତିରେ ଛଡ଼ାଯିବ ନାହିଁ। କେବଳ ଅପରାଧୀ ନୁହେଁ, ଯେଉଁମାନେ ଏହି କାମରେ ସେମାନଙ୍କୁ ସାହାଯ୍ୟ କରୁଛନ୍ତି ବା ବଞ୍ଚାଇବାକୁ ଚେଷ୍ଟା କରୁଛନ୍ତି, ସେମାନେ ବି ବଞ୍ଚିବେନି। ସେ ପୁଲିସ୍ ହେଉ କି ସରକାରୀ ଅଫିସର, ଯିଏ ବି ଡ୍ୟୁଟିରେ ଅବହେଳା କରିବ, ତା’ ବିରୋଧରେ କଡ଼ା ଆକ୍ସନ ନିଆଯିବ।
ରାଜ୍ୟ ସରକାରମାନଙ୍କୁ ଚେତାବନୀ ଦେଇ ମୋଦୀ କହିଛନ୍ତି, “ମହିଳାଙ୍କ ବିରୋଧୀ ଅପରାଧକୁ ସିରିୟସଲି ନିଅନ୍ତୁ।” ସେ କହିଛନ୍ତି ଯେ ଦେଶର ଆଇନ ବହୁତ ଶକ୍ତ, କିନ୍ତୁ ଏହାର ପ୍ରୟୋଗ ସେତିକି ଶୀଘ୍ର ହେବା ଦରକାର। ଫାଷ୍ଟ-ଟ୍ରାକ କୋର୍ଟ ଜରିଆରେ ମାମଲାର ଶୀଘ୍ର ଶୁଣାଣି କରିବାକୁ ସେ ଗୁରୁତ୍ୱ ଦେଇଛନ୍ତି। ଯେତେବେଳେ ଜଣେ ଅପରାଧୀକୁ ଜଲଦି ଦଣ୍ଡ ମିଳିବ, ସେତେବେଳେ ହିଁ ସମାଜରେ ଭୟ ସୃଷ୍ଟି ହେବ ବୋଲି ସେ ମତ ରଖିଛନ୍ତି।
ମୋଦୀଙ୍କ କହିବା କଥା ହେଲା, ସରକାର ସିଷ୍ଟମକୁ ଟାଇଟ୍ କରୁଛନ୍ତି। ମହିଳାଙ୍କୁ ସୁରକ୍ଷା ଦେବା ପାଇଁ ବିଭିନ୍ନ ଯୋଜନା ଓ କଡ଼ା ନିୟମ ଲାଗୁ କରାଯାଉଛି। ଯେଉଁଠି ମହିଳାଙ୍କ ଉପରେ ଅତ୍ୟାଚାର ହେଉଛି, ସେଠି ତୁରନ୍ତ ନ୍ୟାୟ ମିଳିବା ଦରକାର। ଏହି ଲଢ଼େଇରେ କୌଣସି ପ୍ରକାରର ରାଜନୀତି କିମ୍ବା ପାତରଅନ୍ତରକୁ ସହ୍ୟ କରାଯିବ ନାହିଁ ବୋଲି ପ୍ରଧାନମନ୍ତ୍ରୀ ଦୃଢ଼ୋକ୍ତି ପ୍ରକାଶ କରିଛନ୍ତି।
ସୂଚନାଯୋଗ୍ୟ ଯେ, ନିକଟରେ ଦେଶର ବିଭିନ୍ନ ସ୍ଥାନରେ ଘଟିଥିବା ବର୍ବର କାଣ୍ଡ ପରେ ସାଧାରଣ ଜନତାଙ୍କ ଭିତରେ ବଡ଼ ଧରଣର ଅସନ୍ତୋଷ ଦେଖିବାକୁ ମିଳିଛି। ଏଭଳି ସ୍ଥିତିରେ ମୋଦୀଙ୍କ ଏହି ‘ହାଇ-ଭୋଲଟେଜ୍’ ଚେତାବନୀ ରାଜ୍ୟ ସରକାର ଓ ପୁଲିସ୍ ପ୍ରଶାସନ ଉପରେ ଚାପ ବଢ଼ାଇ ଦେଇଛି।
