ସମ୍ବଲପୁର: ସକାଳର ଶୀତୁଆ ପବନ। ଚାରିଆଡ଼େ ନିଶବ୍ଦ ପରିବେଶ। ଜୀବିକା ପାଇଁ ଗାଁର କିଛି ଲୋକ ମହୁଲ ଗୋଟାଇବାକୁ ଜଙ୍ଗଲ ମୁହାଁ ହୋଇଥିଲେ। ହେଲେ ସେମାନେ ଜାଣି ନଥିଲେ ଯେ ଗଛ ଆଢୁଆଳରେ କାଳ ଜଗି ବସିଛି। ନିମିଷକ ମଧ୍ୟରେ ସବୁ କିଛି ଓଲଟପାଲଟ ହୋଇଗଲା। ସମ୍ବଲପୁର ଜିଲ୍ଲା ଜୁଜୁମୁରା ବ୍ଲକରେ ଘଟିଛି ଏମିତି ଏକ ଛାତିଥରା ଘଟଣା।
ମିଳିଥିବା ରିପୋର୍ଟ ଅନୁସାରେ, ଆଜି ସକାଳୁ ଜୁଜୁମୁରା ବ୍ଲକର ଭାଲୁଡୁଙ୍ଗୁରୀ ପାହାଡ଼ ପାଖ ଜଙ୍ଗଲକୁ ମହୁଲ ଗୋଟାଇବାକୁ ଯାଇଥିଲେ ୫୫ ବର୍ଷୀୟ ଛାୟାକାନ୍ତ ପ୍ରଧାନ। ମହୁଲ ଗୋଟାଇବାରେ ସେ ବ୍ୟସ୍ତ ଥିବା ବେଳେ ହଠାତ୍ ସେଠାରେ ଏକ ବଣୁଆ ହାତୀ ପହଞ୍ଚି ଯାଇଥିଲା। ଛାୟାକାନ୍ତ କିଛି ବୁଝିବା ଆଗରୁ ଗଜରାଜ ତାଙ୍କ ଉପରକୁ ଆକ୍ରମଣ କରିଥିଲା। ହାତୀଟି ତାଙ୍କୁ ଟେକି ନେଇ କଚାଡ଼ି ଦେବା ସହ ଗୋଡ଼କୁ ଦଳି ଦେଇଥିଲା।
ତାଙ୍କର ଆର୍ତ୍ତଚିତ୍କାର ଶୁଣି ପାଖରେ ଥିବା ଅନ୍ୟ ଲୋକମାନେ ସେଠାକୁ ଦୌଡ଼ି ଆସିଥିଲେ। ସମସ୍ତେ ମିଶି ପାଟିତୁଣ୍ଡ କରିବାରୁ ହାତୀଟି ଜଙ୍ଗଲ ଭିତରକୁ ପଳାଇଥିଲା। ସ୍ଥାନୀୟ ଲୋକେ ତୁରନ୍ତ ଛାୟାକାନ୍ତଙ୍କୁ ଉଦ୍ଧାର କରି ପ୍ରଥମେ ଜୁଜୁମୁରା ହସ୍ପିଟାଲରେ ଆଡମିଟ୍ କରିଥିଲେ। ହେଲେ ତାଙ୍କର କଣ୍ଡିସନ ସିରିୟସ ଥିବାରୁ ତାଙ୍କୁ ବୁର୍ଲା VIMSAR କୁ ରେଫର କରାଯାଇଛି। ହାତୀ ଆକ୍ରମଣରେ ତାଙ୍କ ଗୋଡ଼ ଭାଙ୍ଗି ଯାଇଥିବା ବେଳେ ଶରୀରର ବିଭିନ୍ନ ସ୍ଥାନରେ ଗଭୀର ଆଘାତ ଲାଗିଛି।
ଏହି ଘଟଣା ପରେ ପୂରା ଅଞ୍ଚଳରେ ଏବେ ହାତୀ ଆତଙ୍କ ଖେଳିଯାଇଛି। ବାରମ୍ବାର ଏମିତି ଆଟାକ ହେଉଥିବାରୁ ଲୋକେ ଭୟରେ ଜଙ୍ଗଲକୁ ଯିବାକୁ ଡରୁଛନ୍ତି। ଫରେଷ୍ଟ ଡିପାର୍ଟମେଣ୍ଟ ତରଫରୁ ଏଦିଗରେ କଡ଼ା ପଦକ୍ଷେପ ନେବାକୁ ଗାଁ ଲୋକେ ଡିମାଣ୍ଡ କରିଛନ୍ତି। ପୁଲିସ୍ ଓ ବନ ବିଭାଗ ଘଟଣାର ତଦନ୍ତ ଆରମ୍ଭ କରିଛନ୍ତି।
