ଜଙ୍କିଆ: ସେଦିନ ରାତି ପ୍ରାୟ 10:30 ହେବ। ଚାରିଆଡ଼େ ନିଶବ୍ଦ ଅନ୍ଧାର। ନିଜ କାମ ସାରି ସୁଶାନ୍ତ ସାଇକେଲ ଧରି ଘରକୁ ଫେରୁଥିଲେ। ମନରେ ଥିଲା ପରିବାର ଲୋକଙ୍କ ପାଖକୁ ଶୀଘ୍ର ପହଞ୍ଚିବାର ଆଶା। କିନ୍ତୁ କିଏ ଜାଣିଥିଲା ଅନ୍ଧାର ରାତିରେ ଯମ ସାଜି ବାଟ ଜଗିଛି ଦନ୍ତା! କିଛି ବୁଝିବା ଆଗରୁ ସବୁ ଶେଷ ହୋଇଗଲା।
ଖୋର୍ଦ୍ଧା ଜିଲ୍ଲା ଜଙ୍କିଆ ଥାନା ଅନ୍ତର୍ଗତ ସିକୋ ଫାଣ୍ଡି ଅଞ୍ଚଳରେ ଘଟିଛି ଏହି ହୃଦୟବିଦାରକ ଘଟଣା। ହାତୀ ଆକ୍ରମଣରେ ନିଧିପୁର ଆଦିବାସୀ ସାହିର ସୁଶାନ୍ତ କୁମାର ନାୟକ (35)ଙ୍କର ମୃତ୍ୟୁ ହୋଇଛି। ସୂଚନା ଅନୁଯାୟୀ, ସୁଶାନ୍ତ ହଜ ଗ୍ରାମରୁ କାମ ସାରି ନିଜ ଘରକୁ ଫେରୁଥିଲେ। କଲରାଝର ଗ୍ରାମ ଶେଷମୁଣ୍ଡରେ ହଠାତ ଏକ ଜ जंगली ହାତୀ ସହ ତାଙ୍କର ସାମ୍ନାସାମ୍ନି ହୋଇଥିଲା। ହାତୀଟି ସୁଶାନ୍ତଙ୍କୁ ଦଳିଚକଟି ମାରିଦେବା ସହ ତାଙ୍କ ସାଇକେଲକୁ ମଧ୍ୟ ଭାଙ୍ଗି ଚୂରମାର କରିଦେଇଛି।
ସୁଶାନ୍ତ ଥିଲେ ପରିବାରର ଏକମାତ୍ର ରୋଜଗାରକ୍ଷମ ବ୍ୟକ୍ତି। ତାଙ୍କ ମୃତ୍ୟୁ ପରେ ତାଙ୍କ ବିଧବା ମା’, ସ୍ତ୍ରୀ ଓ ଦୁଇଟି ଛୋଟ ପିଲା ଏବେ ସମ୍ପୂର୍ଣ୍ଣ ଅସହାୟ ହୋଇପଡ଼ିଛନ୍ତି। ଏହି ଖବର ପ୍ରଚାରିତ ହେବା ପରେ ସ୍ଥାନୀୟ ଅଞ୍ଚଳରେ ତୀବ୍ର ଉତ୍ତେଜନା ଦେଖାଦେଇଛି।
କ୍ଷତିପୂରଣ ଦାବିରେ ଉତ୍ୟକ୍ତ ଲୋକେ ହଜ ଛକଠାରେ ନୟାଗଡ଼-ପୁରୀ ନୂଆ ଜଗନ୍ନାଥ ରାସ୍ତାକୁ ଅବରୋଧ କରିଛନ୍ତି। ରାସ୍ତା ଉପରେ ଟାୟାର ଜାଳି ବିକ୍ଷୋଭ ପ୍ରଦର୍ଶନ କରାଯାଉଛି। ଗ୍ରାମବାସୀଙ୍କ ଦାବି ହେଉଛି କି ମୃତକଙ୍କ ପରିବାରକୁ 50 ଲକ୍ଷ ଟଙ୍କାର ସହାୟତା ପ୍ରଦାନ କରାଯାଉ। ନାରଗୋଦା ଜଙ୍ଗଲରୁ ଆସୁଥିବା ହାତୀପଲ ବର୍ଷତମାମ ଏଠାରେ ଫସଲ ନଷ୍ଟ କରିବା ସହ ଧନଜୀବନ ହାନି କରୁଥିବାରୁ ଲୋକେ ବନ ବିଭାଗ ଉପରେ ଚରମ ଅସନ୍ତୋଷ ପ୍ରକାଶ କରିଛନ୍ତି।
ଘଟଣାସ୍ଥଳରେ ପୁଲିସ୍ ଓ ବନ ବିଭାଗ ଅଧିକାରୀ ପହଞ୍ଚି ଲୋକଙ୍କୁ ବୁଝାସୁଝା କରିବାକୁ ଚେଷ୍ଟା କରୁଛନ୍ତି। ମାତ୍ର କ୍ଷତିପୂରଣ ନ ମିଳିବା ପର୍ଯ୍ୟନ୍ତ ରାସ୍ତା ଅବରୋଧ ହଟିବ ନାହିଁ ବୋଲି ଜିଦ୍ରେ ଅଟଳ ଅଛନ୍ତି ଗ୍ରାମବାସୀ। ଫଳରେ ସେହି ରୁଟ୍ରେ ଯାତାୟତ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଛି।
